Ўзбекистонда Халқлар дўстлиги куни белгиланади

Ўзбекистонда Халқлар дўстлиги куни белгиланади. Бу ҳақда 2021 йилга мўлжалланган давлат дастури лойиҳасида айтилган.

Ўзбекистон Республикаси қонуни лойиҳаси ишлаб чиқилади. Лойиҳада 30 июль – Халқаро дўстлик кунини юртимизда “Халқлар дўстлиги куни” деб белгилаш назарда тутилади.

Бажариш муддати - 2021 йил 1 апрель, масъуллар - Миллатлараро муносабатлар ва хорижий мамлакатлар билан дўстлик алоқалари қўмитаси, Адлия вазирлиги.

Шунингдек, “Дўстлик ҳафталиги” ва “Дўстлик” халқаро форум-фестивалини ўтказиш режалаштирилган.

Вазирлар Маҳкамасининг фармойиши лойиҳаси тайёрланади. Лойиҳада “Дўстлик ҳафталиги” ва халқаро форум-фестивал Ўзбекистон Республикасининг миллатлараро тотувликни мустаҳкамлаш соҳасидаги обрўсини янада тарғиб қилиш бўйича аниқ тадбирлар назарда тутилади.

Бажариш муддати - 2021 йил 30 июль, масъуллар - Миллатлараро муносабатлар ва хорижий мамлакатлар билан дўстлик алоқалари қўмитаси, Ташқи ишлар вазирлиги, Инвестициялар ва ташқи савдо вазирлиги, Молия вазирлиги, Адлия вазирлиги.