«Насаф» ўз стадионининг номланиш ҳуқуқини сотади

Ўзбекистон чемпионатининг ўтган мавсумида иккинчи ўринни қўлга киритган Қаршининг «Насаф» клуби ўз стадиони номини ҳамкорлик асосида сотмоқчи. Бу ҳақда клуб расмий Telegram-каналида эълон қилинди.

Каналда эълон қилинган видеороликда «Насаф» клуби тадбиркорларни ҳамкорликка чорлаган. Унда клуб стадионининг турли қисмларида, футболчиларнинг либосларида реклама жойлаштириш мумкинлиги айтилади. Шунингдек, «Насаф» клуби стадиони номи ҳам сотилади. Яъни, келишилган миқдорда пул тўлаган корхона белгиланган муддатда «Насаф» клуби стадиони номини ўз корхонаси ёки маҳсулоти номига ўзгартириш ҳуқуқига эга бўлади. Айни дамда стадион «Марказий» деб аталади.

Охирги вақтларда «Насаф» муваффақиятли мавсум ўтказгани қарамай, қийин молияваий ҳолатни бошдан ўтказаётгани маълум. Шу сабаб «Насаф» ўз машҳурлигидан максимал даражада фойдаланиб, мавсумни кўтаринки кайфиятда якунлаган жамоани сақлаб қолмоқчи.

Маълумот учун, «Насаф» ўтган мавсум чемпионатда иккинчи ўринни эгаллаган бўлса-да, ОЧЛда қатнаша олмайди. Чунки жамоа мусобақада қатнашиш учун махсус лицензия олмаган.

«Насаф» расмий халқаро мусобақада ғолиб бўлган ягона ўзбек клуби ҳисобланади. Қарши клуби 2011 йил ОФК кубогида ғолиб бўлган. Украиналик Анатолий Демьяненко мураббийлигидаги «Насаф» ўша мусобақа финалида Илҳом Шомуродов ва Андрей Переплёткиннинг голлари эвазига Кувайтнинг «Ал Кувайт» жамоасини мағлуб этган. «Насаф» етакчиси Артур Геворкян мусобақанинг энг яхши футболчиси деб топилган.

«Насаф»ни 8 йилдан буён Рўзиқул Бердиев бошқариб келади. Унинг қўл остида жамоа Ўзбекистон чемпионатида 4 марта бронза, 3 марта кумуш медалларни қўлга киритган бўлса, бир мартадан Ўзбекистон Кубоги ва мамлакат суперкубогини қўлга киритган. Бердиев «Насаф»даги фаолиятида 4 марта Ўзбекистоннинг энг яхши мураббийи бўлган.