Қозоғистонда ҳайдовчилик гувоҳномасисиз машина бошқаришга рухсат берилди

Автомобил эгаси ёнида шахсини тасдиқловчи ҳужжатни олиб юриши кифоя.

Фото: Tengrinews.kz

Қозоғистон президенти Қосим-Жўмарт Тўқаев йўл ҳаракати хавфсизлиги бўйича қонунчиликка ўзгартиришлар киритиш тўғрисидаги қонунни имзолади. Бу ҳақда мамлакат президенти матбуот хизмати хабар бермоқда.

Янги қонунга кўра, автомобил эгалари транспорт бошқараётган чоғида ҳайдовчилик гувоҳномаси ва транспорт воситасининг рўйхатдан ўтказилганлиги тўғрисидаги гувоҳномани ёнларида олиб юришлари шарт эмас.

Улар ўзлари билан шахсини тасдиқловчи ҳужжатни олиб юриши кифоя. Автомобил эгаси тўғрисидаги бошқа барча маълумотларни полиция ходими планшети орқали кўриб туради.

Қонунчиликдан шунингдек, автомобилни ҳайдовчилик гувоҳномасисиз ва транспорт воситасининг рўйхатдан ўтказилганлиги тўғрисидаги гувоҳномасиз бошқарганлик учун жавобгарлик чиқариб ташланди.

Тайёрлаган: Дилшод Аскаров

#Қозоғистон #транспорт