Тошкентда интеллектуал транспорт тизими жорий этилмоқда 

Қайд этилишича, янги светофорлар махсус датчиклар орқали машиналар оқимини «кўради». Агар бир йўналиш бўш бўлса, у яшил чироқни беҳуда ёндириб турмайди, балки тирбандлик юзага келган томонга тезроқ йўл беради. Тизим яқинлашаётган автобусни танийди ва унинг жадвалдан кечикмаслиги учун яшил чироқ вақтини автоматик узайтириб бериши мумкин.

Тошкент шаҳар Йўл ҳаракатини ташкил этиш маркази пойтахтда светофорларнинг кенг кўламда алмаштирилаётгани бўйича изоҳ берди. 

Марказнинг маълум қилишича, Тошкентда интеллектуал транспорт тизими жорий этилмоқда. 

“Бу тизим ҳар бир чорраҳани шунчаки «тўхташ ва ҳаракатланиш жойи» эмас, балки вазиятни таҳлил қилиб, оқимни ақлли бошқарадиган марказга айлантиради.

Светофор махсус датчиклар орқали машиналар оқимини «кўради». Агар бир йўналиш бўш бўлса, у яшил чироқни беҳуда ёндириб турмайди, балки тирбандлик юзага келган томонга тезроқ йўл беради.

Тизим яқинлашаётган автобусни танийди ва унинг жадвалдан кечикмаслиги учун яшил чироқ вақтини автоматик узайтириб бериши мумкин”, дейилади марказ изоҳида.

Марказ эски симёғочларни қолдириш техник жиҳатдан имконсиз эканлигининг сабабларини ҳам кўрсатиб ўтган. 

Қайд этилишича, янги стандартларга кўра, барча кабеллар (қувват ва марказий бошқарув билан боғловчи оптик толали алоқа) ер остидан ўтказилади. Эски устунлар шамол, ёғингарчилик ва кутилмаган узилишлардан ҳимояланган бундай «яширин» тизим учун мослаштирилмаган.

Светофорлардаги транспорт оқимини ўлчовчи датчиклар ва видеоаналитика камералари аниқ ишлаши учун устундаги тебранишлар минимал бўлиши шарт. Янги таянчлар зарурий мустаҳкамликка эга бўлиб, эски устунлардаги тебранишлар туфайли маълумотларни ўқишда юзага келадиган хатоларни бартараф этади.

Янги рухланган (цинкланган) таянчлар зангламайди ва ҳар йили бўяшни талаб қилмайди. 

“Асосий мақсад — бошқарувни қўлда тартибга солишдан бутунлай автоматлаштирилган тизимга ўтишдир. Биз шунчаки эски темирларни янгисига алмаштирмаяпмиз — биз Тошкент транспорт тизимини «қўлда» бошқарувдан рақамли тизимга ўтказмоқдамиз. Бу мураккаб лойиҳа бўлиб, уни эски инфратузилма базасида амалга ошириш мутлақо имконсиз”, дейилади Йўл ҳаракатини ташкил этиш маркази изоҳида.