Америкаликлар Барак Обама ва Авраам Линкольнни АҚШ тарихидаги энг яхши президентлар деб аташди. Бундан YouGov хизмати ва The Economist маркази ўтказган сўровнома натижалари дарак бермоқда.
Economist survey ва YouGov АҚШ аҳолисининг турли даврларда фаолият юритган давлат раҳбарлари сиёсатига нисбатан муносабатини аниқловчи тадқиқот ўтказди. 6-9 февраль кунлари 1,5 минг америкалик ўртасида ўтказилган сўровнома давомида АҚШнинг энг яхши ва энг ёмон президентлари аниқланди.
Натижаларга кўра, АҚШнинг 44-президенти Барак Обама энг яхши президентлар рўйхати етакчисига айланди. Унга респондентларнинг 18 фоизи овоз берган. 2-ўринни 17 фоиз овоз билан Авраам Линкольн, 3-ўринни Дональд Трамп (13 фоиз), кейинги ўринларни эса Франклин Д. Рузвельт (12 фоиз), Райан Рейнольдс (10 фоиз) ва Жорж Вашингтон (9 фоиз) эгаллаган.
Респондентлар фикрига кўра, энг ёмон президентлар рўйхатидан Дональд Трамп (46 фоиз), Барак Обама (24 фоиз), Ричард Никсон (5 фоиз), Кичик Жорж Буш (4 фоиз) ва Билл Клинтон (4 фоиз) жой олган.
АҚШнинг амалдаги президенти Жо Байден сўровномага қўйилмаган, чунки ўз ишини бошлаганига ҳали бир ой ҳам бўлмади.
Республикачилар фикрига кўра, энг яхши президентлар олтиталиги қуйидагича кўриниш олган: Трамп (36 фоиз), Рональд Рейган (18 фоиз), Линкольн (13 фоиз), Вашингтон (11 фоиз), Жон Кеннеди (5 фоиз), Франклин Рузвельт (3 фоиз). Демократлар эса Обамани (34 фоиз), Рузвельтни (19 фоиз), Линкольнни (17 фоиз), Кеннедини (7 фоиз), Вашингтонни (6 фоиз), Билл Клинтон (4 фоиз) ва Жимми Картерни (1 фоиз) энг яхши президентлар деб топишган.
