Ўзбекистонда ҳокимият вакилининг талабига бўйсунмасликка даъват қилиш ва яна бир нечта ҳаракатлар учун жиноий жавобгарлик белгиланяпти. Бу эса жамоатчилик хавотирига сабаб бўлмоқда. Қонунчилик палатаси спикери ўринбосари Одилжон Тожиев бу хавотирлар «кўриб чиқилиши»ни айтди.
Олий Мажлис Қонунчилик палатаси спикери ўринбосари Одилжон Тожиев 24 февраль куни Kun.uz'да эълон қилинган мақолага муносабат билдирди.
Мақолада «Миллий тикланиш» ва «Адолат» партияси депутатлари таклиф қилаётган янги қонун лойиҳаси журналист ва блогерларда хавотир уйғотаётгани ёритилган эди.
Спикернинг ахборот сиёсати бўйича ўринбосари Kun.uz мухбирига тақдим этган муносабатда айтилишича, депутатлар шундай қонун қабул қилишга зарурат бор, деган фикрда. Яъни қонун лойиҳаси биринчи ўқишда концептуал жиҳатдан қабул қилиниб, лойиҳа устидаги муҳокамалар энди бошланган.
«Маълумот ўрнида, мазкур қонун лойиҳаси таклиф ва мулоҳазалар билдириш учун 19 февраль куни расмий сайтимизга юкланган.
Қонун лойиҳасида ёлғонга қарши курашиш, сўз эркинлигини ҳурмат қилиш, турли санкцияланмаган даъватларнинг олдини олиш ва жамоатчиликка тарқатилаётган ахборотга нисбатан масъулиятли бўлишга чорлов бор, холос. Ният шу экани очиқ-ойдин ҳақиқатдир.
Журналист ва блогерларнинг қонун лойиҳасига, – фикрнинг мазмуни ва хулосалар турфалигидан қатъи назар, – жўшқинлик билан муносабат билдиргани, муҳокамалар бўлаётгани яхши. Қонунчилик палатаси, ҳусусан, қонун ташаббускорлари бу таклиф ва мулоҳазаларни, албатта, атрофлича кўриб чиқади, кейинги ўқишларда барча жиҳатлар муҳокама қилинади.
Қўшимча қилиб айтаманки, яқин орада парламентнинг оммавий ахборот воситалари ва блогерлар билан алоқаларини янада мустаҳкамлаш масаласида давра суҳбати ташкил этамиз», – дейди Одилжон Тожиев.
Маълумот учун, ўтган йили Халқаро рейтинг ва индекслар билан ишлаш бўйича республика кенгаши ташкил қилинган эди. Унга кўра, Республика кенгаши парламент назорати остида бўлади. Сенат раиси Кенгашга раҳбарлик қилади.
Бу кенгашнинг вазифаларидан бири – норматив-ҳуқуқий ҳужжатлар ва уларнинг лойиҳаларини Ўзбекистоннинг халқаро рейтинг ва индекслардаги ўрнига таъсири нуқтайи назаридан баҳолаб бориш.
Таклиф қилинаётган қонун лойиҳаси мамлакатнинг халқаро рейтинглардаги ўрнига бевосита таъсир кўрсатиши мумкинлиги инобатга олинса, Халқаро рейтинг ва индекслар билан ишлаш бўйича республика кенгаши ҳам лойиҳага баҳо бериши мақсадга мувофиқ.
