Фото: EPA
Конго Демократик Республикасида охирги ҳафталарда қариялар орасида номаълум касалликдан 15га яқин ўлим ҳолати қайд қилинди.
Agence France-Presse агентлигининг хабар беришича, 60 ёшдан 80 ёшгача кишиларнинг ўлимига олиб келган касаллик сабаби ҳозирча аниқланмаган.
Кванго провинцияси губернатори Жан-Мари Петининг таъкидлашича, касаллик бош оғриғидан бошланиб, сўнгра оғриқ бутун тана бўйлаб сезилади. Шундан кейин нафас олиш билан боғлиқ муаммолар кузатилиб, бир қатор ҳолатларда касаллик ўлим билан якунланади.
Касалликнинг тарқалиши ўчоғи Ангола билан чегарадаги Касонго-Люнда туманида жойлашган. Биринчи касалланган февраль бошида аниқланган. Вафот этганлар тўқималари намуналари пойтахт Киншасадаги илмий марказга ўрганиш учун юборилган.
