Швецияда AstraZeneca вакцинасидан фойдаланиш вақтинча тўхтатилди

Вакцинадан фойдаланиш Европа дори воситалари агентлиги томонидан препаратнинг эҳтимолий ножўя таъсирларини ўрганиш якунлангунига қадар тўхтатиб турилади.

Фото: РИА Новости

Швецияда AstraZeneca швед-инглиз компаниясининг коронавирусга қарши вакцинасидан фойдаланиш вақтинча тўхтатилди. Бу ҳақда Швеция соғлиқни сақлаш агентлиги хабар берди.

Агентликнинг қайд этишича, Astra Zeneca вакцинаси коронавирусга қарши кучли ҳимоя билан таъминлайди, ҳозирга қадар 17 млн доза вакцинадан фойдаланилган. Швециянинг ўзида эмланганларда ножўя таъсирлар кузатилмаган.

Аввалроқ Европанинг ўндан ортиқ давлатлари эмланганларда тромблар ҳосил бўлиши тўғрисидаги хабарлардан сўнг AstraZeneca вакцинасидан фойдаланишни тўхтатганди.

Жаҳон соғлиқни сақлаш ташкилоти бош директори Тедрос Гебрейесус вакциналар хавфсизлиги бўйича маслаҳат кенгаши AstraZeneca вакцинасидан фойдаланиш билан боғлиқ масалаларни кўриб чиқишини маълум қилди.