Оқ уй АҚШ Пекин Олимпиадасини бойкот қилишни муҳокама қилмаганини маълум қилди  

Оқ уй матбуот котиби Женнифер Псаки АҚШ ўз иттифоқдошлари билан 2022 йилда Пекинда ўтадиган қишки Олимпиадани бойкот қилишни муҳокама қилмаётганини маълум қилди.  

“Биз иттифоқдошлар ва ҳамкорлар билан ҳеч қандай бойкотни муҳокама қилмаганмиз”, деб маълум қилган Псаки журналистларга.  

Аввалроқ АҚШ давлат департаменти матбуот котиби Нед Прайс журналистларга АҚШ иттифоқдош давлатлар билан Пекин Олимпиадасини бойкот қилишни муҳокама қилаётганини маълум қилган. Бироқ кейинроқ давлат департаменти бу баёнотни рад этган.  

Псакининг таъкидлашича, Вашингтон умумий ёндашув ишлаб чиқиш учун ҳамкорлар билан барча даражаларда маслаҳатлашув олиб боради, бироқ ўз позициясини ўзгартириш ниятида эмас. 

Пекин Олимпиадасини бойкот қилиш мавзуси АҚШ ва Хитой ўртасидаги муносабатлар таранглашгани ортида пайдо бўлди. Вашингтон Пекинни инсон ҳуқуқларини поймол қилиш ва уйғурлар геноцидида айбламоқда, Пекин эса ушбу айбловларни рад этмоқда. 

Март ойида Халқаро Олимпия қўмитаси президенти Томас Бах Хитойнинг уйғурларга нисбатан сиёсати туфайли Пекин Олимпиадасини бойкот қилиш ғоясини танқид қилганди. “Сизда бирор давлат билан зиддият бўлса, бунинг учун давлатингиз спортчиларини жазолашнинг нима кераги бор? Тарихдан сабоқ олиш кераклигини тавсия қилишим мумкин: Олимпиадаларнинг бойкот қилиниши ҳеч қачон натижа бермаган”, деб таъкидлаб ўтган Бах.   

У бунга мисол тариқасида Афғонистондаги урушга норозилик сабабли 1980 йилги Москва Олимпиадаси бойкот қилинганини эслаб ўтган. “Натижада эса уруш 1989 йилдагина якунланган”, деб айтган ХОҚ президенти.