«Манчестер Сити» 2020/21 йиллар мавсумида Англия чемпиони бўлди.
АПЛнинг 36-турида «Манчестер Юнайтед» «Лестер»га ютқазгач (1:2), Пепа Гвардиола жамоаси муддатидан олдин чемпионликни нишонлайдиган бўлди.
«Шаҳарликлар»нинг рақобатчиси мавсум якунига уч тур қолганида чемпионлик учун математик имкониятларини ҳам йўқотди.
Айни вақтда «Ман Сити»да 80 очко бор, «Юнайтед» – 70 очко билан қолди, учинчи ўриндаги «Челси» 64 очко жамғарган.
Манчестерликлар клуби тўрт йил ичида учинчи марта АПЛнинг бош совринини қўлга киритмоқда. Ўтган мавсумда чемпионлик «Ливерпуль»га насиб қилганди.
«Сити» учун бу ўз тарихидаги еттинчи чемпионликдир. Аввалги олти чемпионлик 1936/37, 1967/68, 2011/12, 2013/14, 2017/18, 2018/19 йилги мавсумларда нишонланган. Энди клуб Англияда чемпион бўлиш бўйича «Челси»ни (6) ортда қолдирди ва «Астон Вилла» билан тенглашиб олди.
Фақат тўрт клуб Англия чемпионатида «Ман Сити»дан кўпроқ ғолиб бўлган. Бу «Эвертон» (9), «Арсенал» (13), «Ливерпуль» (19) ва «Манчестер Юнайтед» (20).
Турнирдаги ғалабаларнинг кўп қисми клуб 2008 йилда шайх Мансур ибн Зайд ал-Найян бошқарувидаги Abu Dhabi United Group инвестиция гуруҳи томонидан сотиб олингач қўлга киритилган.
«Шаҳарликлар» бош мураббийи Пеп Гвардиола учун бу фаолиятидаги 31-совриндир.
Испаниялик мутахассис «Ман Сити» билан жами 10 соврин қўлга киритган – 3 бор АПЛ ғолиблиги, Англия лигаси кубогида 4 ғалаба, Англия Кубогида 1 ғалаба ва Англия Суперкубогида 2 ғалаба.
