Ўзбекистон 4та Airbus вертолёти сотиб олади

UzAirways миллий авиакомпаниясининг шуъба корхонаси – Uzbekistan Helicopters оператори 4 дона Airbus вертолётларига буюртма берди.

«Вертолётларнинг етказиб берилиши кейинги ойга режалаштирилган. Ҳозирда учувчиларимиз ушбу моделларни эксплуатация қилиш бўйича тажриба орттиришмоқда. Airbus H125 ва H130 самолётлари парвоз хизматларининг сифати туфайли аҳолининг мобиллигини оширади», – деб таъкидлаган Uzbekistan Helicopters раҳбари Азиз Сафиуллин.

Airbus Helicopters компаниясининг Ўзбекистондаги савдо директори Ромен Лананинг сўзларига кўра, Ecureuil оиласининг кўп функцияли ва ишончли вертолётларини сотиб олишда иқлим шароитига мослиги инобатга олинган.

Таъкидланишича, H125 вертолётлари баланд ва иссиқ иқлим шароитида учишга мослашган ва олтита йўловчи ўриндиғи, шунингдек, учувчилар учун битта ёки иккита ўриндиққа эга.

H130 вертолёти эса диққатга сазовор жойларни томоша қилиш, авиация тез ёрдами ва кузатув ишлари учун мўлжалланган. Вертолётда битта учувчи ва еттита йўловчи учун ўриндиқлар мавжуд.

Аввалроқ, Ўзбекистондаги илк хусусий авиакомпания Qanot Sharq Airlines 2та Airbus А320-200 самолётини рўйхатдан ўтказгани хабар қилинганди.