Жорий йилнинг 1 июнь кунидан бошлаб оператор ва провайдерлар интернет тезлигини кўрсатишда «-гача» қўшимчаси ўрнига аниқ рақамларни кўрсатиши шарт бўлади.
«Ўзкомназорат» давлат инспекцияси, 2021 йил 1 июндан бошлаб тариф режалари ва хизматлар тўғрисидаги маълумотларда интернет тезлиги учун белгиланган «-гача» («до...») қўшимчалари ўрнига аниқ ва тушунарли маълумот бериш бўйича кўрсатма берди.
Бундан кўзланган асосий мақсад сифатида интернет ва телекоммуникация хизматларини кўрсатувчи оператор ва провайдерлар сифатли ва шартномаларда белгиланган тезликда ўз ишларини амалга ошириши назарда тутилган.
«Ookla» компаниясининг Speedtest.net сервиси 2021 йил апрель ойи натижаларига оид янги маълумотларига кўра, бир йил ичида Ўзбекистонда симли интернет тезлиги бўйича 1,5 баробар (51,8 фоизга) ўсиш кузатилгани қайд этилган, яъни 25,82 Мбит/с.дан (2020 йил апрель ҳолатига кўра) 39,2 Мбит/с.гача (2021 йил апрель ҳолатига кўра).
Шунингдек, жорий йил апрель ойи натижаларига кўра, мобил интернет тезлиги бўйича Ўзбекистон яна тўртта поғонага кўтарилган. Сўнгги йилларда мамлакатда мобил интернет тезлиги 9,68 Мбит/с.дан (2020 йил апрель ҳолатига кўра) 17,28 Мбит/с.гача ўсди (2021 йил апрель ҳолатига кўра).
Аввалроқ, АКТ йўналиши бўйича бош вазир маслаҳатчиси Олимжон Умаров сеҳргар эмаслигини ва интернет тезлигини бирданига ошириш имконсизлигини таъкидлаб ўтганди.
