Қашқадарё вилояти Яккабоғ туманида жойлашган деҳқон бозорида ёнғин содир бўлган. Бу ҳақда вилоят Фавқулодда вазиятлар бошқармаси хабар бермоқда.
Маълум қилинишича, кеча 10 июнь куни соат 21:20ларда Яккабоғ тумани «Бунёдкор» маҳалла фуқаролар йиғини Э.Хўжантоев кўчасида жойлашган, туман «Истиқлол» озиқ-овқат деҳқон бозори ҳудудида ёнғин содир бўлган.
Қайд этилишича, бозордаги сут маҳсулотлари сотиладиган енгил конструкцияли дўконда ёнғин келиб чиққан. Ёнғинни бартараф этиш учун Яккабоғ тумани Фавқулодда вазиятлар бўлимидан 2 та ёнғин-қутқарув бўлинмаси жалб қилинган. Соат тахминан 22:00лар атрофида ёнғин тўлиқ ўчирилган.
Таъкидланишича, содир бўлган ёнғин натижасида ҳеч ким тан жароҳати олмаган. Фақат дўкон ва унинг ичидаги маҳсулотларни сақлашга мўлжалланган 2 дона музлаткич ёниб кетган. Ҳозирда ёнғин келиб чиқиш сабаблари ва кўрилган моддий зарар миқдори аниқланмоқда.
