Орол денгизининг қуриган тубидаги 3 кунлик «Ралли Мўйноқ» қандай ўтади?

Олдинроқ 18-20 июнь кунлари Мўйноқ туманида «Ралли Мўйноқ – 2021» автомобиль спорт мусобақалари бўлиб ўтиши ҳақида маълумот бергандик. Мусобақага бош соврин сифатида президент совғаси – 2 дона «Nexia» машинаси қўйилган.

Пойгалар бошланишидан бир неча кун олдин мусобақа дастури эълон қилинди. 
Унга кўра, 

• Биринчи кун, 17 июнь соат 10:00дан 17:00гача - иштирокчиларни рўйхатга олиш, спорт автомобилларни техник кўрикдан ўтказиш. Соат 17:30дан 18:30гача - мусобақа иштирокчилари ва ҳакамлар ҳайъати билан умумий йиғилиш.
• Иккинчи кун, 18 июнь соат 8:00дан 9:00гача - спорт автомобилларини техник ва экипаж аъзоларини тиббий кўрикдан ўтказиш. Соат 10:00дан – автопойга мусобақасининг тантанали очилиши. Соат 10:30 – биринчи экипаж старти. Соат 18:00 – сўнгги экипаж финиши (регруппинг), иштирокчилар Орол денгизининг ҳозирги қирғоқларида тунашга қолади («Оқтумсиқ»). Соат 20:30 – дастлабки натижаларнинг эълон қилиниши;
• Учинчи кун, 19 июнь соат 8:00дан 9:00гача – спорт автомобилларини техник ва экипаж аъзоларини тиббий кўрикдан ўтказиш. Соат 9:30дан – биринчи экипаж старти. Соат 14:00дан – сўнгги экипаж финиши. Соат 17:00 – спорт мусабоқаси иштирокчилари билан умумий йиғилиш. Соат 18:30 – дастлабки натижаларнинг эълон қилиниши;
• Тўртинчи кун, 20 июнь соат 10:00да мусобақа ғолибларини тақдирлаш маросими бўлиб ўтиши режалаштирилган. 

Мусобақалар қуйидаги класслар бўйича ташкиллаштирилмоқда:

• двигатель ҳажми 1600 см³ гача «А-8» автомобиль класси бўйича;
• двигатель ҳажми 2000 см³ гача «А-9» автомобиль класси бўйича;
• двигатель ҳажми 2000 см³ гача «Багги»;
• двигатель ҳажми 500 см³ гача мотоцикллар бўйича.

Эслатиб ўтамиз, Қорақалпоғистон Республикаси Жўқорғи Кенгеси ва Вазирлар Кенгаши, Ўзбекистон Бош прокуратураси, Ўзбекистон мудофаасига кўмаклашувчи «Ватанпарвар» ташкилоти мусобақа ташкилотчилари этиб белгиланган.