ФВВ ходимлари томонидан каналда чўкиб кетаётган қиз қутқариб қолинди

Чортоқ туманидан ўтувчи «Катта Наманган канали»да оқиб кетаётган қизча ФВВ ходими томонидан қутқариб қолинди.

Ҳодиса кеча, 15 июнь куни соат 19:40 ларда, Наманган вилояти Чортоқ шаҳар ҳудудидан оқиб ўтувчи “Катта Наманган канали”да  юзага келган. 

Маълум бўлишича, мазкур ҳудудда хизмат олиб бораётган Чортоқ туман Фавқулодда вазиятлар бўлими ёнғин-қутқарувчилари каналда оқиб кетаётган қизни кўриб қолган. Шундан сўнг, ФВВ ходимлари зудлик билан қутқарув ишларини амалга оширганлар. 

Қутқарувчиларнинг олиб борган тезкор саъй-ҳаракатлари натижасида фуқаро ҳушсиз ҳолда қутқариб олиниб, биринчи тиббий ёрдам кўрсатилган ва ўзига келтирилган. Ўзига келтирилган қиз туман тиббиёт бирлашмасига юборилган.

Ҳозирги вақтда қутқарилган инсоннинг аҳволи ўнгланган.