Сирдарё вилояти Боёвут туманида фуқаронинг уй-жойи ёниб кетган. Оқибатда хонадоннинг 104 метр квадрат майдони ёнган. Бу ҳақда вилоят Фавқулодда вазиятлар бошқармаси хабар бермоқда.
Маълум қилинишича, жорий йил 20 июнь куни соат 12:50да Боёвут тумани, «Фарҳод» МФЙ, Шабнам кўчаси 32-уйда ёнғин содир бўлган. Ёнғинга жами 4 та ёнғин-қутқарув экипажлари жалб этилган. Дастлабки экипаж ёнғин жойига соат 12:55 да етиб борган ва соат 13:40да ёнғин батамом ўчирилган.
Қайд этилишича, ёнғиндан яшаш уйининг 104 метр квадрат майдонидаги том ва шифт қисми зарарланган. Кўрилган саъй-ҳаракатлар натижасида хонадоннинг 400 метр квадрат майдони сақлаб қолинган.
Таъкидланишича, ёнғинда ҳеч ким жароҳат олмаган. Ҳозирда ёнғин сабаби ва моддий зарар миқдори аниқланмоқда.
