Самарқанд вилояти Самарқанд тумани ҳудудида туз ортиб кетаётган юк машинаси ағдарилиб кетган. Бу ҳақда вилоят ИИБ ЙҲХБ хабар бермоқда.
Маълум қилинишича, бугун, 16 июль куни соат 10:00ларда М39 Алмати-Тошкент-Термиз халқаро автомобиль йўлининг 1081-километрида туз ортиб кетаётган юк машинаси ағдарилиб кетган.
Қайд этилишича, Бухоро-Тошкент йўналишида ҳаракатланиб кетаётган юк машинасининг ҳайдовчиси, айланма ҳаракатланиш давомида, рулни кескин буриб юборган. Оқибатда юк машинаси ўнг томонга ағдарилган ва йўлни тўсиб қўйган.
Таъкидланишича, мазкур йўл-транспорт ҳодисасида ҳеч ким тан жароҳати олмаган. Фақат юк машинаси шикастланган. Унга ортилган тузга зарар етган. Ҳодиса вилоят ИИБ ЙҲХБ ходимлари томонидан тегишли тартибда расмийлаштирилган.
