Президент мактаблари кириш имтиҳонларининг саралаш босқичи 26, 27 ва 28 июл кунлари ўтказилиши режалаштирилган. Жавоблар август ойининг биринчи ярмида эълон қилинади.
Президент мактабларига кириш имтиҳонларининг саралаш босқичи қачон бўлиши ҳақида Президент, ижод ва ихтисослаштирилган мактабларни ривожлантириш агентлиги Қабул комиссияси раҳбари ўринбосари Шерзод Худойқулов маълумот берди.
Унга кўра, Президент мактабларига кириш имтиҳонларининг саралаш босқичи 26, 27, 28 июл кунлари ўтказилиши режалаштирилган. Жавоблар Cambridge Assesment томонидан август ойининг биринчи ярмида ташкилот расмий веб-сайтида эълон қилинади.
Шунингдек, у Президент мактабларига ариза топширган талабгорларга биринчи босқич саралаш имтиҳонларига рухсатномаларни қаердан ва қай тартибда олинишини тушунтириб ўтди.
«Президент, ижод ва ихтисослаштирилган мактабларни ривожлантириш агентлиги томонидан Президент мактабларига ариза топширган талабгорларга биринчи босқич саралаш имтиҳонларига рухсатномаларни юклаб олиш ҳақида жорий йилнинг 20 июлигача смс-хабарнома жўнатилади. Шундан сўнг талабгор ariza.piima.uz сайтига кириб, «Шахсий кабинет» бўлимини очиши ва у ерга ўз ID рақамларини киритиш орқали рухсатномани юклаб олиши мумкин.
Ўқувчидан маслаҳат-таништирув ва имтиҳон кунига шу рухсатнома билан келиш талаб қилинади, ота-оналар имтиҳон жараёнларини test2021.uz сайти орқали онлайн кузатиш имкониятига эга бўлишади», – деди Қабул комиссияси раҳбари ўринбосари.
