Ўзбекистонга «Pfizer» вакцинасидан 1,2 млн доза олиб келинади

Президент Шавкат Мирзиёевнинг Олмалиқ шаҳрига ташрифи жараёнида берилган маълумотларга кўра, Ўзбекистонга 1,2 млн доза “Pfizer” вакцинаси келтирилади. Бу ҳақда Kun.uz мухбири хабар бермоқда.

Фото: Reuters

29 июль куни президент Шавкат Мирзиёев Олмалиқ шаҳрига ташрифи чоғида “Jurabek Laboratories” МЧЖ қўшма корхонасида бўлди. Бу ерда давлат раҳбари COVID-19’га қарши вакцина ишлаб чиқариш жараёнлари билан танишди.

Маълум бўлишича, Ўзбекистонга яна 17,9 млн доза вакцина етиб келиши режалаштирилган:

“Moderna” — 3 млн доза;
“Pfizer/Bio N Tech” — 1,2 млн доза;
“ZF-UZ-VAC-2001” — 12 млн доза;
“Спутник V” — 1,7 млн доза.

Шунингдек, 2021 йилда харид қилинган барча вакциналарга 44 млн 761,5 минг АҚШ доллари сарфлангани маълум қилинди. Шундан ўзбек-хитой вакцинасига 39 млн 100 минг доллар, “Спутник V” вакцинасига 3 млн 681,5 минг доллар ва “AstraZeneca” вакцинасига 1 млн 980 минг доллар сарфланган.

Давлат раҳбари вакцина ишлаб чиқариш жараёни билан танишар экан, халқ учун эмланиш ниҳоятда зарурлигини таъкидлади. “Касалликни енгишнинг бундан самаралироқ усули йўқ”, деди у.

Учрашувда айтилишича, Ўзбекистонда ишлаб чиқарилиши кутилаётган «Спутник V» вакцинасининг биринчи намунаси Jurabek Laboratories томонидан ишлаб чиқилиб, Россиянинг Гамалея институтига текшириш учун юборилган. Мазкур вакцинани ишлаб чиқариш август ойи якунига қадар йўлга қўйилиши мўлжалланган