ХДП президентлик сайловида Мақсуда Ворисова номзодини илгари суради

Ўзбекистон президентлик сайловида Халқ демократик партияси томонидан Мақсуда Ворисова номзод сифатида иштирок этади. Бунгача Экопартия, «Адолат» ва «Миллий тикланиш» демократик партияси ҳам ўз раисини президентлик сайловида номзод сифатида тавсия этганди.

Ўзбекистон Халқ демократик партиясининг 7 август кунги IV пленумида 2021 йилги президентлик сайловида Мақсуда Ворисовани номзод сифатида кўрсатиш масаласи муҳокама қилинди.

Пленум давомида Мақсуда Ворисова номзоди партия қурултойида номзод сифатида илгари суриш таклифи билдирилди. Сўзга чиққанлар бу таклифни бир овоздан маъқуллади.

М.Варисова 1961 йил Тошкент шаҳрида туғилган. 1984 йили Тошкент медицина институтини тугатган. Кўп йиллар давомида соғлиқни сақлаш тизимида , шунингдек, Сенат аъзоси сифатида фаолият юритган. 2020 йилдан Олий Мажлис Қонунчилик палатаси депутати, Фуқароларнинг соғлиғини сақлаш масалалари қўмитаси раисининг ўринбосари.

Ўзбекистон президенти сайлови кампаниясига 23 июль куни старт берилди. Сайловларда 5 та партия – «Адолат» СДП, «Миллий тикланиш» ДП, ЎзЛиДеП, ХДП ва Ўзбекистон Экологик партияси ўз номзодини илгари суриш ҳуқуқига эга. Сайлов 24 октябрь куни бўлиб ўтади.

Қонунчиликка кўра, партия юқори органи унинг номзодини маъқуллаши, Республикадаги жами сайловчиларнинг камида 1 фоизи номзодни қўллаб-қувватлаб имзо қўйиши керак бўлади.

Бундан олдинроқ, Экопартия президентлик сайлови учун партия раиси Нарзулла Обломуродов номзодини, «Адолат» социал-демократик партияси партия сиёсий кенгаши раиси Баҳром Абдуҳалимов номзодини, «Миллий тикланиш» партияси партия раҳбари Алишер Қодиров номзодини тавсия этганди.

#Мақсуда Ворисова #ХДП

Сайлов қонунчилигига киритилган ўзгартишларга кўра сайловлар октябр ойи учинчи ўн кунлигининг биринчи якшанбасида ўтказилиши белгиланди. 2021 йилги президентлик сайлови 24 октябрга тўғри келмоқда.