Словакияда «Спутник V» вакцинаси билан эмлаш тўхтатилади

Словакияда 31 август куни Россиянинг коронавирусга қарши «Спутник V» вакцинасининг иккинчи дозаси билан эмланишнинг охирги куни ҳисобланади. Мамлакатда ушбу вакцина билан эмлашни тўхтатишга қарор қилинган, деб хабар берди ТАСС.

Словакияда «Спутник V» билан эмлаш 7 июндан бошланганди. 30 июндан эмланишни истовчиларни рўйхатга олиш тўхтатилган. Ушбу вакцина билан 10,5 мингга яқин киши эмланган, яна 8,1 минг киши иккинчи дозани олади.

1 март куни Словакия бош вазири Игор Матович Россиядан «Спутник V» вакцинасини сотиб олишга топшириқ берган, аммо тўрт партиядан иккитаси бунга қарши чиққанди. Ҳар икки партия Матовичнинг истеъфосини талаб қилганидан сўнг у лавозимини тарк этишга мажбур бўлди.

Ҳозирда словакияликлар Pfizer / BioNTech, Moderna, AstraZeneca, Johnson & Johnson вакциналари билан эмланиши мумкин.