Халқ устаси: “Мақсадимиз ҳунарларимизда анъанани сақлаб қолиш”

Бухоро вилоятининг Ғиждувон туманига “Ўзбекистоннинг Хитойи” дея таъриф берилади. Чунки ушбу туманда тадбиркорлар ҳам, тадбиркорликнинг тури ҳам кўп. Шу билан бир қаторда ҳудудда миллий ҳунармандчилик яхши ривожланган. Kun.uz машҳур кулол, яқинда “Ўзбекистон Республикаси халқ устаси” фахрий унвони билан тақдирланган Абдулла Нарзуллаев хонадонида бўлди.

Абдулла Нарзуллаев машҳур кулолчилар сулоласининг олтинчи вакили. Унинг ота-боболари ҳам ушбу касб билан шуғулланган. Бугун кулолнинг хонадони, у ерда ташкил қилинган музей ва меҳмон уйи 3 та миллий ҳунармандчилик – каштачилик, гиламдўзлик ва кулолчилик марказлари уйғунлашган ҳунармандчилик академиясига ўхшайди.

Кулолнинг опаси Мавлуда Нарзуллаева ва оила бекаси Гулбаҳор Нарзуллаева каштадўзлик билан, келини Зарина Ўткирова гиламдўзлик, ўғли Акмалжон Нарзуллаев эса кулолчилик билан шуғулланади.

Абдулла Нарзуллаевнинг маълум қилишича, оиланинг миллий кулолчилик музей мажмуаси халқаро сайёҳлик маршрутига киритилган. Турли давлатлардан келган сайёҳлар хонадонга ташриф буюриб, ҳунармандчилик маҳсулотлари, иш жараёни ва сулола тарихи билан танишади.

“Бизнинг асосий мақсадимиз ҳунарларимизда анъанани сақлаб қолиш. Шунинг учун ҳар учала ҳунарда ҳам маҳаллий хомашёдан фойдаланамиз ва маҳаллий услубда ишлаймиз. Ота-боболаримиз ҳам асрлар мобайнида худди шу каби кулолчилик чархларида ишлаб келганлар. Улар мана шундай тегирмонларда сир тайёрлаганлар, шу каби хумдонларда ўз асарларини пишириб олганлар. Тупроқни Ғиждувон атрофидан оламиз. Соз тупроқни бориб ўзимиз танлаймиз. Отам раҳматли бизга ўргатган эдиларки, кесакни очиб қуёшга қаратганда унинг қуми бўлмаслиги керак. Иккинчи белгиси эса кесакнинг ичида ғоваклари бўлса, демак у соз тупроқ. Албатта, уни танлаб олгандан кейин устахонага олиб келиб, ҳар бир янги тупроқ билан тажрибалар қиламиз. Чунки ҳар бир тупроқнинг ўз характери бор”, — дейди Абдулла Нарзуллаев.

Халқ устасининг таъкидлашича, Ғиждувон анъанавий кулолчилиги безак санъатига киради. Маҳсулотларни хорижлик ва маҳаллий харидорлар асосан безак сифатида сотиб олишади. Лекин улардан уй-рўзғор буюмлари сифатида ҳам фойдаланса бўлади.

Кўплаб давлатларда ўз кўргазмалари билан ўзбек ҳунармандчилигини тарғиб қилган Абдулла Нарзуллаев ҳозирда Исроил давлатида навбатдаги кўргазмасини ташкил қилиш учун тайёргарлик кўрмоқда.