Литвада фуқаролар Хитой смартфонларидан фойдаланмасликка чақирилди

Литва мудофаа вазирлиги фуқароларни Хитой смартфонларини сотиб олмасликка чақирди. CNN телеканалининг хабар беришича, аҳолига илгари сотиб олинган Хитой гаджетларини ташлаб юбориш тавсия қилинган.

Қайд этилишича, ушбу қурилмаларда контентни цензура қилиш функцияси аниқланган. Аниқлик киритилишича, Xiaomi смартфонларида Тибет, Тайван ва демократик ҳаракатларни қўллаб-қувватловчи фикрлар цензура қилинади.

Литва мудофаа вазирлигининг билдиришича, Mi 10T 5G смартфонларида цензура функцияси ўчирилган. Аммо бу функция исталган вақтда масофадан туриб фаоллаштирилиши мумкин.

Сўнгги вақтда Литва ва Хитой ўртасидаги дипломатик муносабатлар ёмонлашди. Бунга Литва ҳудудида Тайваннинг ўз вакили пайдо бўлиши сабаб бўлди.

Бунга жавобан Пекин Вилнюсдаги элчисини чақириб олди. Шунингдек, Хитой Литвадан Тайван ваколатхонасини ёпишни талаб қилди.