Телеўйиндан интеллектуал ҳаракатга: президент қатнашган «Заковат» брейн-ринг финалидан фоторепортаж

Ҳал қилувчи баҳсда Хоразм жамоаси Навоийни икки рануд натижасига кўра умумий 9:5 ҳисобида мағлуб этиб, республика чемпионига айланди. Бу финалнинг ўзига хослиги шунда эдики, унда Ўзбекистон президенти Шавкат Мирзиёев ҳам иштирок этди.

Финал ўйини якунида сўзга чиққан президент доим «Заковат» ўйинларини жонли кузатишни истагани, баҳсларни телевизор орқали кўриб бориши ҳақида гапирди. Шавкат Мирзиёев мамлакат келажаги илмга интилган ёшлар қўлида эканини яна бир бор таъкидлади. Президент «Заковат» клуби асосчиси Абдурасул Абдуллаев ва клубнинг машҳур вакиллари Бобур Ёқубов, Фурқат Қурбонов, Хушнуд Худойбердиевга миннатдорчилик билдирди. Финалдан кейин Абдурасул Абдуллаев ҳамда ғолиб бўлган Хоразм жамоаси аъзолари давлат мукофоти билан тақдирланди.

Президент Тошкентнинг сўлим жойларидан бирида «Заковат» клуби учун бино қуриб берилиши, «Заковат» стипендияси жорий этилиши, интеллектуал ўйинлар бўйича президент соврини учун мусобақалар ташкил этилишини маълум қилди. Шавкат Мирзиёев «Заковат» клубини молиялаштириш муҳим эканини айтиб, бу учун 50 миллиард сўм ажратилишини эълон қилди.

Тадбирда сўзга чиққан «Заковат» клуби асосчиси Абдурасул Абдуллаев «Заковат» узоқ йиллар ҳомий йўқлигидан қийинчиликка учрагани ва оқибатда ўтган йили эфирдан олинганини ачиниш билан эслади. Лойиҳанинг асосчиси ва бошловчиси 2021 йил аввалида яна эфирга қайтган «Заковат» оддий телеўйин бўлиб эмас, катта интеллектуал ёшлар ҳаракатида айланиб қайтганини таъкидлади.

Мусобақа ғолиби бўлган Хоразм жамоаси аъзолари биттадан Chevrolet Gentra автомобили билан тақдирланишди.

Ўткир Жалолхонов, Жаҳонгир Алибоев (фото) тайёрлади