Тошкент шаҳар 1-сонли болалар клиник шифохонасига бир кунда 190-200 бемор қабул қилинмоқда. Болаларини шамоллаш аломатлари билан олиб келган оналар 3-4 соат ва ҳатто ундан ҳам кўпроқ навбат кутишига тўғри келмоқда.
Ижтимоий тармоқларда болалар орасида шамоллаш кўпайгани ҳақидаги муҳокамалардан сўнг Kun.uz мухбири Тошкент шаҳар 1-сонли болалар клиник шифохонасидаги вазият билан танишди.
12 октябр ҳолатига кўра, кун кеч бўлишига қарамай, клиникада навбатлар чўғи камаймагани кузатилди.
Шифокорларнинг айтишича, беморларнинг аксарияти – шамоллаб қолган 3–18 ёшдаги болалар ва ўсмирлар.
Бир оила 2-3 тагача боласини шамоллаш билан клиникага олиб келмоқда. Беморларни 3 шифокор кўрикдан ўтказмоқда. Kun.uz билан суҳбатда бўлган клиника шифокорининг айтишича, бир кунда 190-200 бемор қабул қилинмоқда.
Навбатда турган оналардан бири 3-4 соат навбат кутганини айтади.
Шифокорлар фуқароларни эҳтиёт чораларини кўриш, турли юқумли касалликлардан ўзларини ҳимоя қилиш ва болалар соғлиғига эътиборли бўлишга чақирди.