Хоразмда қаҳвахонага бостириб кирган Cobalt воқеаси: 2 киши жиддий жароҳатлангани маълум бўлди

Урганч шаҳридаги ЙТҲда икки киши жиддий жароҳатланди. Kun.uz жабрланганларга оид тиббий маълумотномалар билан танишди. 

Нима бўлганди?

12 июн куни кечга яқин Урганч шаҳрида катта тезликда ҳаракатланган Cobalt машинаси чорраҳада бошқарувни йўқотиб, йўл четига чиқиб кетган ва “Coffelito coffee” қаҳвахонасига бузиб кирган эди.

Транспорт воситаси 20 ёшли И.И. бошқарувида бўлган. У чорраҳада тезликни оширган ва бошқа бир машинани уриб юбормаслик учун рулни буриб, бошқарувни йўқотган. Ижтимоий тармоқларда тарқалган видеоларда кўринишича, Cobalt чорраҳанинг ўнг томонида жойлашган қаҳвахона эшигини бузиб ўтган ҳолда ичкарига “бостириб” кирган. Оқибатда, қаҳвахонада ўтирган 20 ва 21 ёшли йигитлар жароҳатланган.

“Енгил шилиниш”ми ёки оғир жароҳат?

ЙҲХХнинг Kun.uz сўровига жавобан берган маълумотномасида келтирилишича, жабрланувчилардан бири “чап қўл шилиниши”, иккинчиси эса “ўнг юз шилиниши” билан боғлиқ енгил тан жароҳати олган. Уларга шифохонада биринчи тез тиббий ёрдам кўрсатилгани ҳамда уйига рухсат берилган.

Бироқ, таҳририятга келиб тушган тиббий хулосаларга кўра, вазият анча жиддий: жабрланувчилар енгил эмас, жиддий тан жароҳати олган бўлиши мумкин.

Хусусан, Kun.uz танишган маълумотномаларда йигитлардан бири чап пастки жағ суягининг вертикал синиши, чап энса суяги синиши, бош қисмида травматик ўзгаришлар ҳамда бўйин умуртқа поғонаси сегментлари шикастланиши, иккинчиси эса фиброз ҳалқанинг йиртилиши, дурал қоп деформацияси, умуртқа канали стенози ва бошқа турдаги жароҳатлар олгани қайд этилган. Йигитлардан бири ҳозиргача касалхонада қолмоқда.

Kun.uz манбаси Cobalt ҳайдовчисининг отаси ИИБ тизимига алоқадор шахс эканини ва у суриштирувга таъсир ўтказишга уринаётганини айтмоқда.