Меркел БМТда ишлаш тўғрисидаги таклифни рад этди

Канцлерлик лавозимини тарк этишидан бироз аввал Ангел Меркел бундан буён сиёсат билан шуғулланмаслигини айтганди.

Германия собиқ канцлери Ангела Меркел БМТ бош котиби Антониу Гутерришнинг ташкилотдаги тузилмалардан бирида раҳбарлик лавозимини эгаллаш тўғрисидаги таклифини рад этди, деб хабар берди dpa агентлиги.

Хабарга кўра, собиқ канцлер БМТ бош котиби билан телефон орқали қилган мулоқотида таклиф учун миннатдорлик билдирган ва уни қабул қилолмаслигини айтган.

Аввалроқ ОАВ Ангела Меркелга БМТда глобал ижтимоий фаровонлик бўйича маслаҳат кенгаши раҳбари лавозими таклиф этилгани ҳақида хабар қилганди.

Ангела Меркел 2005 йилдан 2021 йилга қадар Германия ҳукуматига раҳбарлик қилган.

Лавозимини тарк этишидан бироз аввал Меркел бундан буён сиёсат билан шуғулланмаслигини айтган.

"Сиёсий низоларни ечиш билан шуғулланмайман – кўп йиллар давомида бу иш билан машғул бўлдим. Ҳозир нима билан шуғулланишимни билмайман. Озгина дам оламан, кейин кўрамиз", деган у.