Ўзбекистонда умуммиллий конституция имтиҳони ўтказилади

Вазирлар Маҳкамасининг “Жамиятда ҳуқуқий маданиятни юксалтириш бўйича қўшимча чора-тадбирлар тўғрисида”ги қарори лойиҳаси эълон қилинди.

Қуйидагиларни назарда тутувчи 2022-2023 йилларда жамиятда ҳуқуқий маданиятни юксалтириш бўйича чора-тадбирлар дастури тасдиқланади:

• шахс, давлат ва жамиятнинг ўзаро муносабатларида аҳолининг ҳуқуқий маданиятини юксалтириш;
• жамиятда ҳуқуқий маданиятни юксалтиришда ҳуқуқий тарғиботнинг инновацион усулларини жорий қилиш;
• аҳолининг ҳуқуқий маданиятини юксалтиришда оммавий ахборот воситаларининг ролини кучайтириш;
• юридик таълимни, шунингдек юридик кадрларни тайёрлаш, қайта тайёрлаш ва уларнинг малакасини ошириш тизимини ривожлантириш;
• ҳуқуқий маданиятни юксалтиришнинг илмий асосларини тадқиқ этиш.

Адлия вазирлигининг фуқароларнинг конституциявий билимларини оширишга бўлган қизиқишларини рағбатлантириш мақсадида республика миқёсидаги умуммиллий конституция имтиҳонини ўтказиш таклифи маъқулланади.

2022 йил 1 сентябрга қадар Адлия вазирлиги Ахборот технологиялари ва коммуникацияларини ривожлантириш вазирлиги билан биргаликда умуммиллий конституция имтиҳонини ўтказиш учун мавжуд платформани қуйидагиларни инобатга олган ҳолда модернизация қилади:

• платформада фуқароларнинг ёш даражалари бўйича ўзбек ва рус тилларида (зарурат бўлганида бошқа тилларда ҳам) тест синовларини ишлаш имкониятини яратиш;
• олий ва ўрта-махсус юридик маълумотли шахслар учун алоҳида тест синовларини киритиш;
• ҳар бир йўналишлар бўйича рейтингларни автоматик ҳисоблаш тизимини ишга тушириш;
• платформа фойдаланувчиларини жисмоний шахснинг шахсий идентификация рақами орқали идентификация қилиш имкониятини яратиш;
• платформанинг мобил иловасини ишлаб чиқиш.

2023 йил 1 декабрга қадар аҳолининг барча қатлами учун мўлжалланган «Юридик кутубхона» электрон тизими ва унинг мобил иловаси ишга туширилади.