Касаначилар билан ишлайдиган тадбиркорларга 500 млрд сўм йўналтирилади

Ўзбекистонда касаначилар билан ишлайдиган тадбиркорларга 500 млрд сўм ажратилади. Бу ҳақда президент матбуот котиби Шерзод Асадов хабар берди.

Шавкат Мирзиёев раислигида 19 апрель куни ўтказилган йиғилишда касаначиликни ривожлантириш хотин-қизлар, ногиронлиги бор аҳолини иш билан таъминлаш учун яхши имконият эканлиги таъкидланди.

• Шу муносабат билан, касаначилар билан ишлайдиган тадбиркорларга:
• оилавий тадбиркорлик дастуридан 500 миллиард сўм йўналтирилади;
• оладиган кредитлари бўйича Тадбиркорлик жамғармасидан 75 фоизлик кафиллик берилади ҳамда фоиз харажатларининг 10 фоиздан юқори қисми қоплаб берилади.

Касаначиларга эса:

• ўзини ўзи банд қилган фуқаролар каби фақат ижтимоий солиқ тўлаш имконияти берилади;
• олис ҳудудда ишлаётган касаначиларнинг дастлабки 1 ойлик иш ҳақи давлат томонидан қоплаб берилади.

Вилоят ҳокимларига ушбу имкониятлардан фойдаланиб йил якунига қадар 100 минг нафар аҳолининг бандлигини таъминлаш топширилди.