Термиз шаҳридаги «Алпомиш» спорт мажмуасининг томи қулаб тушгани айтилмоқда

Ижтимоий тармоқларда бугун, 2022 йил 7 май куни Термиз шаҳридаги “Алпомиш” спорт мажмуасининг томи қулаб тушгани айтилган хабарлар тарқалди. Хабарга илова қилинган видеода айтилишича, спорт мажмуасининг томи қулаб тушишидан бироз аввал у ерда шуғулланиб турган болалар чиқиб кетишган ва шу сабабли ҳодисада ҳеч ким жароҳат олмаган.

Спорт мажмуасининг томи нима сабабдан қулаб тушгани маълум эмас. Шунингдек, ҳодиса ҳақида расмий изоҳ берилмади.

Kun.uz ҳодиса юзасидан изоҳ олиш учун вилоят Фавқулодда вазиятлар бошқармаси ахборот хизмати ҳамда вилоят ҳокимлиги ахборот хизмати раҳбарлари билан боғланди. Улар Бойсунда эканликларини, у ерда ўтказилаётган халқаро фестивалда ташкилий ишлар билан бандлигини айтиб, Термиздаги спорт мажмуасининг томи қулаб тушгани ҳақида маълумотга эга эмаслигини маълум қилишди.

Термиз шаҳар ҳокимлиги ахборот хизмати раҳбари билан боғланишнинг иложи бўлмади.

Маълумот учун, Термиз шаҳрида жойлашган «Алпомиш» спорт мажмуасида турли спорт турлари бўйича мамлакат биринчиликлари ва вилоят миқёсидаги мусобақалар ўтказиб келинган.