Президентнинг тегишли қарори ортидан, шу қарор чиққунга қадар ўтган бир неча ҳафта ичида автомобили ойналарини қорайтириш учун тўлов қилганлар саросимага тушиб қолганлари бор гап. Уларни битта савол қизиқтирмоқда: тўланган пул қайтариб берилиши эҳтимоли борми?
Ўзбекистонда 1 июлдан бошлаб машиналарнинг орқа ён ойналари тусини ўзгартириш учун рухсатнома талаб этилмайдиган бўлди. Олд ён ойналарни қорайтириш рухсатномаси нархи эса 6 бараварга арзонлашди. Бу борада тегишли президент қарори эълон қилинди.
Бу янгиликдан ҳамма бирдек хурсанд бўлди дейиш қийин: ўтган яқин ҳафталарда “тонировка” арзонлашиши ёки буткул текин бўлиши ҳақидаги гап-сўзларга қарамай, рухсатнома сотиб олганларнинг афсусини тушуниш мумкин, чунки бундай гап-сўзлар аввалги йиллари ҳам бўлган ва кўп нарса ўзгармай қолганди. Эндиликда уларни битта савол қизиқтирмоқда: тўланган пул қайтариб берилиши мумкинми?
Бу саволга тегишли норматив ҳужжатлардан жавоб излаб кўрамиз.
Президентнинг “Автотранспорт воситаларидан фойдаланишда аҳолига қўшимча қулайликлар яратиш чора-тадбирлари тўғрисида”ги қарори жорий йил 28 июн куни имзоланган бўлса-да, унинг айнан “тонировка”га оид қисми 2022 йил 1 июлдан кучга кириши белгилаб қўйилган.
“Норматив-ҳуқуқий ҳужжатлар тўғрисида”ги қонуннинг 40-моддасига кўра, норматив-ҳуқуқий ҳужжатлар, агар ҳужжатларнинг ўзида кечроқ муддат кўрсатилмаган бўлса, расмий эълон қилинган кундан эътиборан кучга киради.
Демак, “тонировка” бўйича янгилик 1 июлдан бошлаб кучга киради ва ундан аввалги амалга оширилган юридик ҳаракатларга тааллуқли бўлмайди.
Таъкидлаш лозим, автоойналарни қорайтиришга оид амалдаги талаб 30 июн куни 23:59 га қадар сақланиб қолади. Бу орқа ён ойналарни тегишли рухсатномани олмасдан тонировка ўрнатганларга ҳам маъмурий чора кўриш мумкинлигини англатади.
Хулоса қилиб айтганда, рухсатнома учун тўланган маблағ қайтарилмайди. 1 июлгача орқа ён ойналарни ноқонуний қорайтириб қўлга тушган ҳайдовчилар омади чопмаган тақдирда 7,5 млн сўм (15 кун ичида тўланса, 5 млн 250 минг сўм) жаримага тортилади.
Бу – амалдаги рухсатномаси муддати 29 июн соат 23:59да тугаган ва уни узайтирмаганларга ҳам тааллуқли. Бундай ҳайдовчилар 30 июн куни автомобилини кўчага ҳайдаб чиқмаганлари маъқул.
