Amnesty International Украинанинг танқидига жавоб қайтарди

Amnesty International ташкилоти Украина қуролли кучлари аҳоли турар жойлари, мактаб ва шифохоналарда жойлашгани тўғрисидаги ҳисоботни тайёрлашда Россия назорати остидаги ҳудудларда яшовчи аҳолининг кўрсатмаларидан фойдаланилганини инкор этади.

Ташкилот Украина стратегик коммуникациялар марказининг тегишли баёнотига ана шундай жавоб қайтарди. Аввалроқ марказ ҳуқуқни ҳимоя қилиш ташкилоти ҳисобот тайёрлаш учун Россия назорати остидаги ҳудудлардаги қамоқхоналар ёки «фильтрацион лагерлар»даги одамларнинг кўрсатмаларидан фойдаланганини таъкидлаганди.

«Биз қўшимча далиллар тўплаш учун интервью олган одамларнинг ҳеч бири Россия қамоқхоналари ёки «фильтрацион лагерлари» ёхуд Amnesty International кира олмайдиган Россия назорати остидаги ҳудудлардан эмас», — дейилади ташкилот баёнотида.

4 август куни Amnesty International «Украина уруши тактикаси тинч аҳолига хавф туғдиряпти» номли ҳисоботини эълон қилди. Унда ҳуқуқ ҳимоячилари УҚК бўлинмалари бир неча бор турар жойлар, мактаблар ва касалхоналар ҳудудида ўз техникаларини жойлаштиргани ҳамда шу позициялардан ўқ узганини, бу эса тинч аҳоли учун хавф туғдираётганини таъкидлаган.

Ташкилотнинг Украинадаги ваколатхонаси директори Оксана Покалчук ҳисобот эълон қилинган куннинг эртасига ишдан бўшаганини эълон қилди.

Amnesty International ташкилотининг Швециядаги бўлинмаси ҳаммуассиси Пер Вестберг ҳам Украина қуролли кучлари айбланган ҳисоботдан норози бўлгани учун ўз лавозимини тарк этишини айтди.

Ташкилот кейинроқ мазкур ҳисобот учун узр сўради. Шу билан бирга, ҳуқуқ ҳимоячилари ҳисоботда келтирилган хулосалардан воз кечмаслигини билдирган.