Fly Dubai авиакомпаниясига Дубай - Наманган - Дубай йўналишида мунтазам авиақатновларни амалга ошириш учун рухсатнома берилди.
Ўзбекистон ҳукумати ва Бирлашган Араб Амирликлари ҳукумати ўртасида ҳаво қатнови тўғрисидаги битим асосида 30 августда “Ўзавиация” агентлиги томонидан Fly Dubai авиакомпаниясининг Ўзбекистонга мунтазам авиақатновларни амалга ошириш ҳуқуқини берувчи эксплуатацион рухсатномасига янги - Дубай - Наманган - Дубай йўналиши киритилди.
Бу авиакомпания томонидан мунтазам парвозларни амалга ошириш учун рухсат олган Ўзбекистондаги учинчи аэропорт ҳисобланади. Ҳозирги кунда авиакомпания Тошкент ва Самарқанд аэропортларига авиақатновларни амалга оширмоқда.
Fly Dubai авиакомпанияси Ўзбекистонга мунтазам авиақатновларни Boeing 737 ҳаво кемаларида амалга оширади.
Бундан олдин FlyNas авиакомпаниясига Жидда – Тошкент – Жидда йўналишида мунтазам авиақатновларни амалга ошириш учун рухсатнома берилганди.
