Москва муниципал депутатлари Путиндан истеъфога чиқишни сўради

8 сентябр куни «Ломоносовский» Москва муниципал округи депутатлари кенгаши Россия президенти Владимир Путиндан истеъфога чиқишни сўради. Москва мундепларининг президентга эълон қилинган мурожаатида ҳокимият ўзгариши мамлакатнинг муваффақиятли ривожланиши учун муҳим экани айтилади, Путин учун эса иккинчи муддатдан кейин «ҳамма нарса қандайдир тарзда нотўғри кетди: ЯИМ ошмади, минимал иш ҳақи эълон қилинган рақамларга етмади, ақлли ва меҳнатга лаёқатли одамлар Россияни оммавий тарк этяпти, ваъда қилинган барқарорлик кўринмаяпти».

«Сиз ва сизнинг қўл остидагиларингиз ишлатаётган риторика узоқ вақт давомида муросасизлик ва тажовузкорлик билан ўралган эди, бу охир-оқибатда мамлакатимизни Совуқ уруш даврига қайтарди. Россиядан яна қўрқиб, нафратлана бошлашди, биз яна бутун дунёни ядро қуроли билан қўрқитмоқдамиз», - деб давом этади «Ломоносовский» МО депутатлари. 

Улар Путиннинг қарашлари ва унинг бошқарув модели «умидсиз равишда эскирган ҳамда Россия ва унинг инсон салоҳияти ривожланишига тўсқинлик қилмоқда», деган хулоса келишди. Шу муносабат билан Москва мундеплари Россия президентидан «ўзини ўзи эгаллаб турган лавозимдан озод қилишни» сўрашди.

8 сентябр куни бўлиб ўтган ўша йиғилишда Ломоносовский округи депутатлари Москва мэри Сергей Собянинга ҳам мурожаат қабул қилишди. Уларнинг таъкидлашича, Москвада маҳаллий ўзини ўзи бошқариш тизими амалда ишламаяпти, туман даражасида икки томонлама ҳокимият ривожланган, бу эса маҳаллий аҳоли ва улар вакилларининг ҳар қандай ташаббусларига тўсқинлик қилмоқда.  

7 сентябр куни Санкт-Петербургнинг «Смолнинское» муниципалитети кенгаши депутатлари Давлат думасини Путинни ишдан бўшатишга чақиришганди. Уларга кўра, Россия президенти Путиннинг ҳаракатларида Россия конституциясининг давлатга хиёнат ҳақидаги моддасида назарда тутилган жиноят белгилари мавжуд. Хусусан, улар Россия армиясининг жанговар тайёр бўлинмаларининг йўқ қилиниши, Россиянинг ёш ва меҳнатга лаёқатли фуқароларининг ўлими ва жароҳати, Россия иқтисодиётига етказилган зарар, Украинадаги «махсус операция»дан сўнг юз берган НАТОнинг кенгайиши ва Украина армияси замонавий Ғарб техникаси билан жиҳозланаётганига эътибор қаратмоқда. Бу - унинг «демилитаризация» мақсадига зиддир. 

Сўнг, Санкт-Петербургнинг «Смолнинское» муниципал округи кенгашининг Давлат думасини Путинни истеъфога чиқаришга чақирган депутатлари полицияга чақирилди – «ҳокимиятни обрўсизлантириш» тўғрисида протокол тузилди.