Еврокомиссия раҳбари: Путин ҳаракатлари янги санкциялар билан жазоланиши керак

Владимир Путиннинг қисман сафарбарлик тўғрисидаги буйруғидан сўнг Украинадаги ҳарбий можаро янги кескинлашуви янги санкциялар билан жазоланиши керак, деди Европа комиссияси раиси Урсула фон дер Ляйен 21 сентябр, чоршанба куни Нью-Йоркда БМТ Бош ассамблеяси сессияси арафасида Американинг CNN медиакомпанияси мухбири билан суҳбатда.

Фон дер Ляйеннинг таъкидлашича, Путин етарлича тайёргарлик кўрмаган, тажрибага ва мотивацияга эга бўлмаган ҳарбий хизматчиларни сафарбар қилиш ва «Украина суверен тупроғида псевдореферендумлар»ни ташкил этиш орқали ўз кучсизлигини кўрсатмоқда. «Шундай экан, мен ишонаманки, бу яна биз томондан санкцияларни талаб қилади», деб таъкидлади Еврокомиссия раҳбари. У Европа иттифоқининг айнан қайси жазо чораларини назарда тутганини аниқлаштирмаган.

Урсула фон дер Ляйен CNN телеканалининг мавжуд санкцияларни қанчалик самарали деб ўйлайсиз, деган саволига, Россия саноати пасайиб кетганини, Москва ҳарбий соҳада, хусусан, яримўтказгичлар етказиб бериш билан боғлиқ муаммолар туфайли жиддий қийинчиликларни бошдан кечираётганини таъкидлади.

Оврўполиклар Путиннинг ядровий қурол билан шантажига бўйсунмайди, деди Европа комиссияси раҳбари Украинанинг Ғарб қуролларини етказиб беришни давом эттириш ҳақидаги илтимосини қўллаб-қувватлаб. Сўнгги бир неча ой ичида украиналиклар аста-секинлик билан керакли нарсани олишди ва ўзларини муваффақиятли ҳимоя қилиш қобилиятини исботлашди, шунинг учун уларга қулоқ тутиш керак, деди Урсула фон дер Ляйен.

Август ойи охирида Германиянинг учта таниқли сиёсатчиси Украинага, ҳатто Бундесверни вақтинчалик заифлаштирса ҳам, кўпроқ қурол етказиб беришга чақирди. Der Spiegel журналида социал-демократ Кристиан Клинк, «яшил» Зара Нанни ва эркин демократ Александр Мюллер қўшма мақоласида Берлиннинг Германия ва НАТОни ҳимоя қилишда Бундесвер салоҳиятини сақлаб қолиш Украинага ёрдам беришдан устун туриши ҳақидаги ҳозирги позициясини танқид қилди.

Шу билан бирга, 22 август куни Германия Мудофаа вазирлиги ҳукмрон коалициядан бўлган Бундестаг депутатларининг Украинага қўшимча қурол-яроғ етказиб бериш, бунда, керак бўлса, Бундесверни заифлаштиришга рози бўлиш таклифини рад этди.