2017 йилда, ўша пайтда Америка президенти лавозимига киришган Доналд Трамп Ҳамбургдаги G20 саммити доирасида Россия президенти Владимир Путин билан биринчи шахсий учрашувини ўтказган ва унда Путиннинг Украинага Америка қуроллари эҳтимолий етказиб берилиши бўйича фикрини сўраган. Россия президенти бу Қўшма Штатлар томонидан «хато» бўлиши ҳақида жавоб берган. Бу ҳақда 5 октябр, шанба куни The New York Times (NYT) ёзмоқда.
Трамп билан суҳбатда Путин Украинани «коррупцияга учраган, хаёлий мамлакат» деб атади ва Россия унга таъсир ўтказишга тўлиқ ҳаққи борлигини таъкидлади. Ҳамбургдаги ўша саммитда қатнашган уч америкалик мулозимга кўра, Россияга қарши маслаҳатчилари томонидан бир қанча тезислар тузиб берилган Трамп Путинга эътироз билдира олмаган.
Суҳбатдан сўнг АҚШ давлат котиби лавозимига номзод бўлган Рекс Тиллерсон Трамп маъмуриятини «президентнинг Украина ҳақидаги фикрини ўзгартириш учун кўп иш қилишлари кераклиги» ҳақида огоҳлантирган. «Тиллерсон ҳозиргина собиқ «КГБ» жосуси жаноб Путиннинг Америка янги президентининг фикрлаш тарзини шакллантириш бўйича маҳорат дарси ўтказганини кузатди», — дея тушунтиради NYT нима бўлганини.
NYT: 7 йилдан кейин ҳам Трампнинг Украинага нисбатан муносабати ўзгармади
Трампнинг Украинага нисбатан муносабати ва Киев демократларни қўллаб-қувватлашига шубҳа қилиши жорий президентлик кампанияси даврида ҳам пайдо бўлишда давом этмоқда, деб ёзади The New York Times ўтган ой АҚШ президентлигига Демократик партиядан номзод Камала Ҳаррис билан бўлган дебат чоғида Трамп Украина урушда ғалаба қозонишини хоҳлайдими, деган саволга тўғридан тўғри жавобдан қочганини эслатиб ўтди.
Ўтган ҳафта у Украина президенти Володимир Зеленскийни АҚШга қилган сўнгги сафаридан Ҳарриснинг сайловолди ташвиқотини кучайтириш учун фойдаланганликда, асосий овозларни тақсимловчи штат бўлган Пенсилваниядаги ўқ-дори заводига ташриф буюрганликда айблади. «Менимча, Зеленский тарихдаги энг буюк сотувчидир, - деди Трамп Зеленский штатга ташриф буюрган кунининг эртаси куни бўлиб ўтган митингда. - У ҳар сафар бу мамлакатга келганида 60 миллиард доллар билан кетади».
Трамп: Путин ҳам, Зеленский ҳам урушни тугатмоқчи
Украина президенти Володимир Зеленский 27 сентябр куни Ню-Йоркдаги «Трамп-тауэр» осмонўпар биносида АҚШ президентлигига номзод Доналд Трамп билан учрашди. 40 дақиқа давом этган суҳбат давомида Трамп бўлажак президентлик сайловларида ғалаба қозонса, Украинадаги урушни тугатишини яна бир бор таъкидлади. Украина етакчиси билан суҳбатдан сўнг Трамп иккаласи ҳам «адолатли келишув»ни исташларини таъкидлади.
