Меркел Путиннинг ядровий таҳдидларини жиддий қабул қилишга чақирди

Россия президенти Владимир Путиннинг Украинага қарши урушда ядро қуролидан фойдаланиш таҳдидини эътибордан четда қолдирмаслик керак, дейди Германия собиқ канцлери Ангела Меркел. «Сиз унинг сўзларини жиддий қабул қилишингиз керак, уларни бошидан эътиборсиз қолдирмаслик керак, уларни алаҳсираш деб ҳисобламаслик лозим», деди Меркел сешанба, 27 сентябрь куни Берлинда федерал канцлер Ҳелмут Кол фондининг очилишида.

Унинг сўзларига кўра, бундай ёндашув «ҳеч қандай ҳолатда заифлик ёки тинчланиш белгиси эмас, балки сиёсий доноликдан далолат беради». Шу тариқа, Ғарб ҳаракат майдонини сақлаб қолиши ва ҳатто уни кенгайтириши мумкин, деб ҳисоблайди Ангела Меркел.

У Россия билан можарода шерикларининг розилигисиз қандайдир чора кўришдан бош тортаётган ҳозирги Германия ҳукуматининг позициясини қўллаб-қувватлади. Меркелнинг сўзларига кўра, агар Ҳелмут Кол бугун Германия ҳукумати раҳбари бўлганида, «Украина суверенитети ва ҳудудий яхлитлигини ҳимоя қилиш ва тиклаш учун ҳамма нарсани қилган бўларди». Аммо шу билан бирга, Кол ҳозирда тасаввур қилиш қийин бўлган нарсани, яъни келажакда Россия билан муносабатлар қандай бўлиши мумкинлигини эътибордан четда қолдирмас эди ва буни иттифоқчилар розилигисиз амалга оширмаган бўларди, деди собиқ канцлер.

Россиянинг Украинага қарши ҳарбий агрессияси бошланганидан кейин Ангела Меркел 16 йил давомида бошқарган ҳукуматларнинг Москвага нисбатан сиёсати учун бир неча бор танқид қилинган. Ҳозиргача Меркел, камдан-кам истисно ҳолатлардан ташқари, бу тажовузни баҳолашдан ўзини тийиб келяпти.

Украинага қилинган ҳужумдан сўнг, Владимир Путин, Россия ҳукуматининг бошқа вакиллари, шунингдек, тарғиботчилар РФга ядровий ҳужум ёки экзистенциал таҳдид бўлган тақдирда, Россия ядро қуролидан фойдаланиши мумкинлигини бир неча бор очиқ айтди. 21 сентябр куни Путин сафарбарлик бошланиши муносабати билан халққа қилган мурожаатида Россия ҳукумати ўз ҳудудларини ҳимоя қилиш учун барча имкониятларни ишга солишга тайёрлигини айтди ва «бу ҳазил эмас»лигини таъкидлади.

Эртаси куни Россия Хавфсизлик кенгаши раисининг ўринбосари Дмитрий Медведев ўзини ўзи мустақил деб эълон қилган «ДХР» ва «ЛХР», шунингдек, Украинанинг Херсон ва Запорижжя областларининг эгаллаб олинган қисмлари «Россия таркибига қабул қилинса», улар Россия қуролли кучлари томонидан ҳимоя қилиниши ва армия «ҳар қандай рус қуролидан, шу жумладан стратегик ядровий қуролдан» фойдаланиши мумкинлиги ҳақида огоҳлантириш билан чиқди.