Россия бош вазири ўринбосарининг оиласига тегишли 50 млрд рубллик активлар топилди

Алексей Навалний жамоаси 6 октябр, пайшанба куни Россия бош вазирининг мамлакатдаги ижтимоий сиёсат бўйича ўринбосари Татяна Голикова оиласининг мол-мулки бўйича текширувни эълон қилди. Мухолифат вакилларининг сўзларига кўра, амалдор ва яқин қариндошларининг мол-мулки камида 50 миллиард рублга баҳоланмоқда.

«Татяна Голикованинг шахсий бойлиги Свердловск областининг соғлиқни сақлашга қаратилган барча харажатларидан кўпроқ, бу бутун Калуга области тиббиёти учун беш йиллик бюджетдир», - дейди суриштирув муаллифлари.

Навалний жамоасига кўра, Голиковалар оиласида самолёт, Испанияда гольф клуби ва Россияда учта гольф клуби, Испания ва Португалияда бир нечта виллалар, Мовий қирғоқ ва Россияда кўчмас мулк, шунингдек, фармацевтика компанияларидаги улушлар бор.

Хусусан, суриштирувда айтилишича, Голиковалар оиласи Россияда ишлаб чиқилган Спутник V коронавирусга қарши вакцинасидан пул ишлаб, ушбу дорининг энг йирик ишлаб чиқарувчиси бўлган Генериум компаниясида улушга эга. Бундан ташқари, Россия бош вазири ўринбосарининг ўгай ўғли, собиқ бош вазир ўринбосари Виктор Христенконинг ўғли Владимир Кипр фирмалари орқали Нанолек компаниясига эгалик қилади, уларнинг вакциналари, Навалний тарафдорларига кўра, миллий профилактик эмлаш календарига киритилган. 

Коррупцияга қарши курашиш жамғармаси (ККЖ) томонидан ўтказилган суриштирув натижаларига кўра, Татяна Голикова Москва областидаги 1800 квадрат метрлик уйда истиқомат қилади. Унинг қиймати ярим миллиард рублга баҳоланмоқда. Ҳудудда, жумладан, 430 квадрат метр майдонга эга хизматкор уйи, гараж, каскадли сув ҳавзалари ва шаршаралар мавжуд. Расмий равишда, суриштирувчиларга кўра, уй Голикованинг турмуш ўртоғи Виктор Христенкога тегишли.

Навалний жамоасининг билдиришича, Россия бош вазири ўринбосарининг 32 миллион долларлик шахсий Бомбардиер Bombardier Challenger 600 самолёти ҳам бор. Унинг эри Россияда учта гольф клубига эга (Москва областида ва Санкт-Петербург яқинида). Голиковалар оиласига тегишли экани аниқланган яна бир гольф клуби Испанияда жойлашган. Унинг ҳудудида, бошқа нарсалар қаторида, вилла бор, яна бешта вилла қурилмоқда. Испанияда Россия бош вазири ўринбосарининг оиласи 18 миллион евролик бошқа виллага ҳам эгалик қилади. Бундан ташқари, суриштирувда айтилишича, унинг оиласи Португалияда иккита виллага эга.

Навалний жамоаси Татяна Голиковани мамлакатдаги энг нуфузли амалдорлардан бири деб атайди. «Биз Коррупцияга қарши курашиш жамғармаси сифатида Голиковани зудлик билан санкциялар рўйхатига киритишни талаб қиламиз», - дейди суриштирув муаллифлари.