ФХХ базасида 1 млн кишига «чиқарилмайдиган» мақоми берилган бўлиши мумкин

ФХХ чегара хизматида сафарбарлик эълон қилиниши муносабати билан мамлакатдан чиқиб кетиши тақиқланган Россия фуқаролари рўйхати мавжуд. Ҳозир унда 1 миллионга яқин одам қайд этилган бўлиши мумкин. Бу ҳақда 19 октябр, чоршанба куни манбаларга таяниб, Astra ва Baza Telegram-каналлари хабар берди.

Astra маълумотларига кўра, ФХХ тегишли маълумотлар базасида 1 025 703 та ёзув мавжуд. Чегарачилар бу рўйхатни паспорт назоратида текшириб, рўйхатда топиб олишса, одамларни Россиядан ташқарига чиқармаяпти.

Baza канали маълумотларига кўра, сафарбарлик бошланганидан кейин 400 минг россияликнинг хорижга чиқиши чекланган. Гап МИР чегара назорати тизими ҳақида кетаётган бўлиши мумкин, унга, The Bell маълумотларига кўра, четга сафарни тақиқлаш учун турли асослар, шу жумладан суд ижрочилари ва ҳарбий комиссарликлар қарорлари киритилган.

Саёҳат янгиликларини кузатиб борувчи Telegramʼдаги «Ну че, народ, погнали!» канали ФХХнинг Москвадаги Шереметево аэропорти чегара назорати хизмати сўровига расмий жавобини келтириб ўтди. Унда айтилишича, одам чиқиб кетишига рухсат берилгани ёки йўқлигини фақат чегарада билиши мумкин.

Канал маъмурлари чақирув қоғозини топширишга уриниш бўлганидан кейин ҳам ҳарбий хизматга мажбур бўлганлар ҳеч қандай тўсиқсиз мамлакатни тарк этишга муваффақ бўлган ҳолатларга эътибор қаратмоқда. Шу билан бирга, одамларга ҳеч қандай чекловлар йўқлиги ҳақида кўрсатган гувоҳномасига қарамай, чегарадан ўтишига рухсат берилмаган ҳолатлар маълум. «Айтиб ўтилган маълумотлар базаси (агар мавжуд бўлса) номувофиқ ва аниқ тартибга солинмасдан тўлдирилади. Эҳтимол, бундай рўйхатларга шахсларнинг қўшилиши ва маълумотларнинг ФХХга берилиши ҳудудларнинг ташаббуси бўлган, балки бу ҳарбий комиссарликлардан чиққан ғоядир», дейилади постда.

21 сентябр куни Россия президенти Владимир Путин «қисман» сафарбарлик эълон қилди, унга кўра 25 миллионлик захирадан 300 минг кишини армияга чақириш режалаштирилган. Амалда, сафарбарлик оммавий бўлиб чиқди ва қонунбузарликлар билан давом этмоқда. Кўпгина руслар ундан қочишга ҳаракат қиляпти. Тез орада Украинадаги жанговар зонада ҳам, йиғин пунктларида ҳам сафарбар қилинганларнинг ўлими ҳақида маълумот пайдо бўлди. Октябрга келиб, 213 мингдан ортиқ киши армияга жалб қилинди, Путин сафарбарликни ноябргача якунлашга ваъда берди. Унинг матбуот котиби Дмитрий Песковнинг таъкидлашича, 300 мингдан ортиқ россиялик ҳарбий хизматга чақирилмайди, аммо сафарбарлик тўғрисидаги эълон қилинган фармонда унинг кўлами аниқланмаган.