Республикачи Ломбардо Невада штати губернатори этиб сайланди

Номзодини АҚШ собиқ президенти Доналд Трамп қўллаб-қувватлаган республикачи, собиқ полициячи ва Лас-Вегас шерифи 60 ёшли Жо Ломбардо Невада губернатори этиб сайланди. Бу ҳақда 12 ноябрь, шанба куни AP агентлиги хабар берди.

Ломбардо бир муддат Невада губернатори бўлган демократ Стив Сисолакни мағлуб этди. «Ғалаба қозонишимизга тахминан бир фоиз етишмаётганга ўхшайди. Шунинг учун мен шериф билан боғланиб, унга яхшилик тилаб қолдим», - деди Сисолак ўз баёнотида.

Ломбардо 1988 йилда Лас-Вегасда полициячи сифатида ишлай бошлаган ва икки муддат Кларк округи шерифи лавозимини эгаллаган. У штатда жиноятчиликнинг кучайиши билан боғлиқ танқидлар тўғрилигини тан олган, лекин бунинг учун демократларни айблаган, шунингдек, бу тенденцияни ҳуқуқ-тартибот идоралари учун маблағ етишмаслиги билан боғлаган.

Сайлов кампанияси давомида сиёсатчи бир неча бор Трампдан узоқлашди, шунингдек, 2020 йилги президентлик сайлови натижалари сохталаштирилганлиги ҳақида ҳеч қандай баёнот билан чиқиш қилмади.

Невада штатида овозларни ҳисоблаш бу йил чўзилиб кетди. Бунинг сабаби шундаки, 2020 йилда штат почта орқали овоз бериш тизимини сезиларли даражада кенгайтирди, энди унда рўйхатга олинган ҳар бир сайловчига бюллетен юборилади.

Бу йил Невадада сайловчилар овозларининг қарийб 15 фоизи сайловдан кейинги кун рўйхатга олинди ва штатга бюллетенларнинг 100 фоизини ҳисоблаш учун уч кун керак бўлди. Бундан ташқари, Невада штатидаги сайлов участкаларида ёпилиш вақтида узун навбатлар юзага келди ва бу ҳам жойлардан маълумотларни зудлик билан очиқлашга тўсқинлик қилди.

Аризона ва Невада штатларида ўтказилган оралиқ сайлов натижалари АҚШ Конгресси Сенати устидан назоратни ўрнатиш учун калит ҳисобланади. Уларнинг иккаласида ҳам амалдаги сенаторлар Демократик партия тарафдорлари эди.

АҚШда оралиқ сайловлар 8 ноябрь куни бўлиб ўтди. Уларда Вакиллар палатасининг бутун таркиби (435 ўрин) ва Сенатнинг учдан бир қисми (юзтадан 35 ўрин) қайта сайланди. Бундан ташқари, 36 штатда янги губернаторлар сайланяпти.

Жоржияда 6 декабрга белгиланган иккинчи раунд бўлиб ўтади. Бу ҳақда штат давлат котиби Бред Раффенспергер маълум қилди.

АҚШ Конгресси Вакиллар палатасида республикачилар, таҳлилчиларга кўра, 220 дан ортиқ овозга эга бўлади. Оддий кўпчилик учун 218 овоз етарли. Сенат учун кураш давом этмоқда. Умуман олганда, президент Жо Байденнинг Демократик партияси таҳлилчилар тахмин қилганидан яхшироқ натижа кўрсатди.