Шольц Украинада Кремль шартлари асосида ўт очишни тўхтатишга қарши чиқди

Германия канцлери Олаф Шольц Украинада Кремль шартларига кўра ўт очишни тўхтатишга қарши чиқди. Тегишли баёнотни Германия ҳукумати раҳбари 11 ноябрь, жума куни RedaktionsNetzwerk Deutschland (RND) медиагуруҳи томонидан ташкил этилган Лейпцигдаги (Саксония) «RND vor Ort» муҳокамаси чоғида берди.

«Биринчи навбатда, Россия буйруқ бериш ғояси ҳеч нарсага олиб келмаслигини тушуниши керак ва шунчаки фломастерни харитага чизиб, «бу - энди меники», дейиш мумкин эмас, - деди канцлер. - Демак, буйруқ остида тинчликка эришиб бўлмайди, бошқача тушуниш бўлиши керак». Шольцнинг айтишича, у Россия буни тушуниши учун «кўплаб бошқа томонлар билан тинимсиз ишлаяпти», чунки бундай ёндашув - муваффақиятли тинчлик музокаралари учун асосдир.

Германия канцлери, шунингдек, Россия президенти Владимир Путиннинг ҳарбий ҳаракатлари ҳар қандай дипломатик яқинлашувга тўсқинлик қилаётганини таъкидлади. «Биз ҳозир бошдан кечираётган бу ҳалокатли уруш» шароитида Путин, биринчи навбатда, илгари мулоқотга қаратилган барча жараёнларга тўсқинлик қилди, деди Шольц.

«Ҳаммамиз бу уруш тугашини ва тинчлик бўлишини истаймиз», деди канцлер. Шунингдек, у Россия раҳбари билан телефон алоқаларини тўхтатмаганини эслатди. «Тинчликка эришиш Россия президенти билан ҳозиргача олиб борган барча музокаралар мавзуси бўлди ва мен Россия президенти билан телефон орқали гаплашишдан бош тортишимга ҳеч қандай сабаб топилмади, баъзида жуда узоқ суҳбатлар кузатилди», деб тан олди Шольц. Унинг қўшимча қилишича, Украина томони билан ҳам тегишли маслаҳатлашувлар ўтказилган.

Олаф Шольц, шунингдек, Москвага ташрифини эслади - Россиянинг Украинага кенг кўламли бостириб киришидан бироз олдин. «Мен ҳам уруш бошланишидан бироз аввал Москвада бўлганман ва етти метрлик столга ўтириб, Путин билан гаплашганман», деди канцлер. Унинг сўзларига кўра, тўрт соатлик суҳбат давомида Россия раҳбари Украинада «Москвага таҳдид солувчи ракеталар бўлмаслигини», Украина НАТОга қўшилмаслигини талаб қилган. Шольц, ўз навбатида, Киев билан ракеталарни жойлаштиришни истисно қилувчи қурол назорати бўйича келишувларни таклиф қилганини ва Украинанинг НАТОга аъзолиги «яқин ўн, 20, 30 йил ичида» умуман кун тартибида эмаслигини таъкидлади. У Путиндан нега бундай талаблар қўйилгани ҳақида сўраган.

Германия канцлери Украинанинг бир қатор шарқий вилоятлари учун автоном мақомга доир айрим таклифлар муҳокама қилинганини қўшимча қилди. «Мен ҳар куни бу масалаларда ўзгаришни таъминлаш учун ишлаяпман», деди у ва «муайян ўзгаришлар» борлигини таъкидлади. Шу билан бирга, «рол ўйнаган сабабларнинг ҳеч бири бу урушни оқлай олмади, чунки эълон қилинган нарсаларнинг ҳеч бири шунчаки содир бўлмаган», дея қўшимча қилди Олаф Шольц.

Муҳокама чоғида Германия вазирлар маҳкамаси раҳбари АҚШ Конгрессига ўтказилган оралиқ сайлов натижаларига ҳам тўхталиб ўтди. «Ўйлайманки, Жо Байден одатда янги сайланган президент учун ижобий якунланмайдиган сайловлар тахмин қилинганидан кўра яхшироқ ўтганини биляпти», деди Шольц.

Германия канцлерининг сўзларига кўра, Байден Германия ва Европа билан яқин ҳамкорликка умид қилаётгани «жуда яхши». «Менимча, Америка президенти ҳақиқатан ҳам жуда ақлли сиёсатчи, жуда катта тажрибага эга», - дея қўшимча қилди Германия вазирлар маҳкамаси раҳбари. У, шунингдек, Берлин сайлов натижаларидан қатъи назар, АҚШ билан яқин ҳамкорликка тайёр эканини таъкидлади.

Аввалроқ, 5 ноябрь куни Олаф Шольц Россиядан Украинага қарши урушда ядро қуролидан фойдаланиш имкони ҳақида умуман ўйламасликни талаб қилган эди. «Ушбу можарода ядро қуролидан фойдаланиш қабул қилиб бўлмайдиган ва номақбул нарсадир», деди Шольц Берлинда Германия Социал-демократик партиясининг муҳокама қурултойида. «Биз Россиядан бунга йўл қўймасликни талаб қиламиз. Бу кесиб ўтиб бўлмайдиган чегарага айланиши лозим», - дея қўшимча қилди Германия канцлери.

Хитойга ташрифини шарҳлар экан, Шольц Россиянинг Украинага қарши урушда ядро қуролидан фойдаланиши таҳдиди масаласида Хитой раҳбарияти билан умумий позицияни ишлаб чиқиш бу сафарнинг муҳим муваффақияти бўлганини айтди. «Бу ташриф фақат шу мақсадда амалга оширилганининг ўзи ҳам етарли», дея хулоса қилди Германия канцлери.