Қатар Эквадор футболчиларини сотиб олганми?

«Биз бу ўйинга етиб келиш учун жуда кўп иш қилдик. Биз ҳам, мамлакат ҳам. Эртага нималарга қодир эканимизни кўрсатиш учун ажойиб имконият бўлади. Очилишдаги рақибимиз жуда кучли. Эквадор – ёш жамоа, уларда янги авлод шакллана бошлаган. Биз биринчи марта мундиалда ўйнаяпмиз, улар учун эса бу биринчиси эмас. Эртанги ўйинда Эквадор фаворит», деди мураббий.

Санчесдан Қатар миллий жамоаси узоқ вақт мамлакат ташқарисида машғулот ўтказиш орқали мундиалга тайёрлангани ҳақида ҳам сўрашди. Унинг айтишича, бу тўғри йўл деб топилган ва миллий жамоа футболчилари клубидан чақирилиб, алоҳида шуғулланган: «Бизнинг режамиз жаҳон чемпионати учун рақобатбардош жамоа тузиш эди. Бизда танлов имконияти унчалик катта эмас, боридан фойдаланишга мажбурмиз. Футболчиларнинг ҳаммаси маҳаллий лигада ўйнайди. Уларни тайёрлаш йўлларидан бири сифатида мундиалда ўйнайдиганларни чемпионатдан чиқариб олиш деган қарорга келдик. Албатта, футболчиларимиз Бундеслига, АПЛ ва Ла Лигада ўйнаса қанийди.

Ҳа, биз кўп вақтимизни сафарда ўтказишга мажбур бўлдик, лекин бу ҳам йигитларимизнинг иродали эканидан далолат. Менинг ўзим 16 йилдан буён Қатарда бўлсам, эртанги ўйин бутун босиб ўтган йўлимнинг кулминацияси бўлади. 16 йил аввал ЖЧ очилиш ўйинидан олдин сизларнинг олдингизда гапириб ўтиришимни тасаввур ҳам қилмагандим», деди Қатар устози.

Интернетда Қатар мундиал очилиш ўйини олдидан Эквадор футболчиларига улар ўйинни ютқазиб бериши учун пул таклиф қилгани ҳақида миш-миш тарқалди. Санчесдан бу ҳақда ҳам сўрашди: «Интернет жуда зўр нарса, лекин ундан тўғри фойдалансангиз. Агар ундан ёмон мақсадда фойдалансангиз, у хавфли қурол. Қатар ҳақида турли хил иғволар тарқатишмоқда, улар бўлмаган гап эканини айта оламан холос», деди мураббий.

Қатар устози иштирокидаги матбуот анжумани давомида қизиқ воқеа содир бўлди. Асли каталониялик бўлган Санчес Каталония радиоси журналистининг саволига каталон тилида жавоб берди. Таржимон эса фақат испанчадан таржима қилишга мослашгани сабаб мураббийдан жавобни испан тилида такрорлашни сўради. Анчадан буён каталонча гапирмаганини айтиб кулган мураббий бажонидил испанчада ҳам жавобини такрорлади.

Ўткир Жалолхонов, Қатар.