«Прессинг асосий қурол бўлади» – Венгер мундиалдан нималар кутаётганини айтди

Гуруҳнинг таҳлилчилари Қатар ва Уэлсдаги қароргоҳларда тўрт йилликнинг энг йирик мусобақаси ўйинларини илмий ўрганиш билан банд бўлади. Дунёда бундай таҳлил билан шуғулланадиган ташкилотлар бор, лекин улар жамоаларнинг сўровига асосан пул эвазига ўйинларни таҳлил қилиб беради. Венгер раҳбарлигидаги гуруҳ эса замонавий технологиялар ва амалиётда натижаларни қўлга киритган мураббийлар ёрдамида келинадиган илмий хулосаларни мухлислар учун очиқ манбаларда эълон қилиб боради.

19 ноябр куни Қатардаги бош медиа марказда таҳлил гуруҳи раҳбари Арсен Венгер ва футболчи сифатида жаҳон чемпиони бўлган Юрген Клинсман иштирокида матбуот анжумани ўтказилди.

«Биз аввалгидан ҳам кўра кўпроқ маълумот олиш баробарида мухлисларда бу ўйинга нисбатан қизиқиш янада ортиши учун уларни эълон қилиб борамиз ҳам. Мақсадимиз шуки, келажакда мураббийлар мана шу рақамлар орқали талантларни яхшироқ аниқлай олсин, техник таҳлиллар аниқ бўлсин. Биз таҳлилларимизни ҳеч кимга керкак бўлмай қоладиган 2-3 ойдан кейин эмас, мусобақа вақтидаёқ эълон қилиб борамиз», деди Венгер.

«Арсенал» собиқ устозининг айтишича, бундай рақамлар ёрдамида ишланган таҳлиллар футболни янада қизиқиш билан кўришга ёрдам беради. Аммо футболчилар бу таҳлиллардаги кўрсаткичларини яхшилашга уриниб чалғиб қолишлари керак эмас, дейди Венгер.

Ҳар ўйиндан кейин махсус очиқ платформада эълон қилиб бориладиган таҳлилларни ҳар бир ўйинчи учун алоҳида кўриш ҳам мумкин. Яъни, футболчиларнинг ўзига хос профили бўлади.

«Биз футболчилар тўп билан ва тўпсиз қандай ўйнаётганини таҳлил қиламиз. Масалан, Хорватиянинг ўйинида Модрич марказда тўпни етарлича қабул қилиб олмаётган бўлса, нега бундай бўлаётганини аниқлашга уринамиз. Балки уни блоклашгандир, балки марказий ҳимоячи тўпни оширмагандир. Аммо футболчилар бу кўрсаткичга чалғиб қолиши керак эмас, бу таҳлиллардан яхши мақсадда фойдаланиш керак».

Ҳимоя мустаҳкамроқ бўлади

Арсен Венгернинг айтишича, Қатардаги мундиалда Россиядагига қараганда жамоалар ҳимояланишни эртароқ бошлашади. Яъни, ҳужум ва яримҳимоя мудофааланишда фаолроқ иштирок этади.

«Прессинг жамоаларнинг асосий қуролига айланмоқда. Прессинг жуда оммалашди ва универсал кўриниш олди. Қайси жамоани қараманг эрта прессингга киришишга ҳаракат қилади, қарши прессингга ҳам тезда кириша олади. Ҳамма ҳимояга тезроқ босим қилишга интилмоқда. Бу мусобақада узун паслар ва прессингни ёриб ўтиши мумкин бўлган биринчи дриблингларни ўрганиш жуду қизиқ бўлади», дейди «Арсенал» афсонаси.

Франциялик мураббийнинг сўзларига кўра, Аргентина каби яқинда Ле Челсосини йўқотган жамоаларга қийин бўлади. Биринчи ўйинлар эса жуда муҳим, охирги дақиқаларда жароҳатга дуч келмаган, бир хил темпда шуғулланган жамоалар устунликка эга бўлади.

Матбуот анжуманида қатнашган Германия миллий жамоаси сафида жаҳон чемпиони бўлган ва «немис машинаси»ни икки марта муаббий сифатида мундиалга олиб борган Юрган Клинсманнинг сўзларига кўра исталган Осиё ёки Африка жамоаси қатъиятли бўлса, узоққача бориши мумкин. «Аммо ҳимоявий футбол билан узоққа бора олмайсиз», деди Германия миллий жамоаси собиқ устози.

Ўткир Жалолхонов, Қатар.