Украина Қуролли кучлари Бош штаби маълумотларига кўра, Украинада кенг кўламли ҳарбий ҳаракатлар бошланганидан бери Россия 85 мингга яқин аскарини йўқотган.
Бу кўрсаткич сўнгги бир кунда 400 кишига кўпайган, деб хабар берилган Facebook’да.
Бундан ташқари, Украина Қуролли кучлари, жумладан, 2895 та танк (сўнгги 24 соат ичида +3), 5827 та зирҳли жанговар машина (+5), 1882 та артиллерия тизимини (+12), 395 та ялпи ўт очиш реактив тизимини (+2) йўқ қилди.
Маълумотда айтилишича, рақиб кучлари Бахмут ва Лиман йўналишларида энг катта йўқотишларга дуч келган.
Бундан олдин фотосуратлар ва видеолар орқали томонларнинг ҳарбий йўқотишлари ҳақида маълумот тўплайдиган Oryx таҳлилий лойиҳаси Украинада ҳарбий ҳаракатлар бошланганидан бери Россия камида 1500 танкни йўқотгани ҳақида хабар берганди.
Қайд этилишича, 859 та танк йўқ қилинган, 64 таси - шикастланган, 56 таси - ташлаб кетилган, 521 та танк эса Украина кучлари томонидан эгаллаб олинган, деб ёзади Oryx.
Ҳаммаси бўлиб, Россия уруш бошланганидан бери, Oryx маълумотларига кўра, камида 8023 та ҳарбий техникани йўқотди (4914 таси йўқ қилинган, 198 таси шикастланган, 300 таси ташлаб кетилган, 2611 таси Украина Қуролли кучлари томонидан эгаллаб олинган).
Oryx бу вақт ичида Украинанинг йўқотишларини 2287 та ҳарбий техника билан баҳолади. Улардан 1371 таси йўқ қилинган, 94 таси шикастланган, 60 таси ташлаб кетилган, 761 таси россияликлар томонидан эгаллаб олинган.
Рўйхатга фақат йўқотилганлиги очиқ манбалардаги фото ва видео материаллар билан тасдиқланган техникалар киритилган, вайрон қилинган техникаларнинг ҳақиқий миқдори анча юқори, дея таъкидлайди Oryx таҳлилчилари.
