Хитойдаги Apple смартфонлари йиғиладиган заводда ишчилар ғалаён кўтарди

Намойишчиларнинг кўплаб видеолари интернетда пайдо бўлди, унда юзлаб ишчилар махсус полиция қисмлари ва хизмат формасини кийган одамлар билан тўқнаш келганини кўриш мумкин.

Ишчилар норозилигига iPhone ишлаб чиқариш бўйича дунёнинг энг йирик заводи раҳбарияти ишчиларни хабардор қилмасдан, шартномаларни ўзгартиргани сабаб бўлгани айтилмоқда.

Foxconn ўз баёнотида баъзи ишчиларнинг меҳнат ҳақи бўйича шубҳалари борлигини тасдиқлади, аммо уларга меҳнат шартномаларига мувофиқ иш ҳақи тўланишини ваъда қилди. Шунингдек, компания янги келган ходимларни ковид билан касалланган ишчилар билан бир хонага жойлаштиргани ҳақидаги айбловларни инкор қилди. Foxconn хабарига кўра, янги ишчиларни жойлаштиришдан олдин хоналар маҳаллий ҳокимият томонидан дезинфекция қилинган ва текширилган.

Октябр ойида ковид инфекцияси ҳолатлари кўпайгани сабабли, заводда локдаун жорий этилган, аммо кўплаб ишчилар чекловни бузиб, уйларига қочиб кетишганди. Шундан сўнг компания янги ходимларни ишга олди ва уларга катта мукофотлар ваъда қилди.

Бироқ, ходимлар бу ваъдалар бажарилмаганини айтмоқда. Жумладан, заводдан олинган видеоларда баъзи ишчилар «Ҳуқуқларимизни ҳимоя қилинг!» деб ҳайқираётгани, бошқалар эса хавфсизлик камералари ва деразаларни таёқ билан синдираётганини кўриш мумкин.

«Улар ваъда қилинган мукофотни бермаслик учун шартномаларни ўзгартиришди. Бизни карантинда ушлаб туришяпти, лекин озиқ-овқат билан таъминлашмаяпти», деди ишчилардан бири жонли эфирда. «Агар улар бизнинг талабимизни қондирмаса, курашни давом эттирамиз».

Лавҳада сўзлаган одам полиция томонидан бир ходимнинг қаттиқ калтакланганини кўрганини таъкидлаган.

Бошқа бир ходимнинг айтишича, янги келган ишчиларнинг баъзилари ковид инфекцияси тарқалган пайтда заводда бўлган ва карантинга олинган одамлардан касаллик юқишидан қўрқмоқда.

Чоршанба куни эрталаб корхонага полиция қисмлари етиб келган. Буни интернетда жойлаштирилган видео ҳам тасдиқлайди, унда кўплаб қуролланган полициячилар кўринади.

Яна бир ишчининг айтишича, у боши билан қонга беланган одам ерда ётганини кўрган. «Одамлар нима учун норозилик билдираётганини аниқ билмайман, лекин улар биз янги келганларни ковид билан касалланган ишчилар билан қўшиб юборишди», деди у.

Foxconn Тайван компанияси бўлиб, Apple компаниясининг асосий субпудратчисидир. Унинг Чжэнчжоудаги заводи iPhone йиғиладиган дунёдаги энг йирик корхона ҳисобланади.

Октябр ойи охирида, ковид инфекциясининг янги тўлқини ва завод ходимларига нисбатан нотўғри муносабатда бўлиш ҳақидаги миш-мишлар фонида, кўплаб ишчилар заводдан қочиб, уйларига кетишди. Уларнинг қочиб бораётгани ижтимоий тармоқларда кенг муҳокамага сабаб бўлган эди.

Шундан сўнг, компания заводда ёпиқ цикл бўйича иш жараёнини ташкил қилди ва ишчиларни шаҳарнинг қолган қисмидан ажратиб қўйди. Ноябр ойи бошида Apple Чжэнчжоу заводидаги муаммолар туфайли, iPhone 14 етказиб бериш қисқариши ҳақида огоҳлантирди.