АҚШ ҳукумати Венесуэладан нефт импорт қилишга рухсат берди

Вашингтон ушбу мамлакат нефтига нисбатан қўйилган санкцияларни юмшатди.

Фото: AP

Қўшма Штатлар ҳукумати мамлакатдаги энг йирик нефт компанияларидан бири бўлган Chevron корпорациясига Венесуэладан нефт ва нефт маҳсулотларини импорт қилишга рухсат берди. Бунга ҳукумат ва мухолифат ўртасида келишувга эришилгани сабаб бўлган.

Шу тариқа Вашингтон Лотин Америкасидаги ушбу давлатга қарши жорий этилган санкцияларни юмшатди.

«Chevron қўшма корхоналари томонидан ишлаб чиқарилган нефт ёки нефт маҳсулотларини 6 ой давомида Қўшма Штатларга сотиш, экспорт ёки импорт қилишга рухсат берилади», дейилади Молия вазирлиги лицензиясида.

Аввалроқ, The Wall Street Journal Вашингтон Chevron компаниясига Венесуэлада нефт қазиб олиш учун лицензия бермоқчи экани ҳақида хабар қилган эди. Нашрнинг тушунтиришича, бу Венесуэлага қарши санкциялар юмшатилишига ишорадир. Chevron компанияси Petroleos de Venezuela SA билан тузилган қўшма корхоналар орқали Венесуэла конларида нефт қазиб олиш устидан қисман назоратни тиклашга қарор қилди.

АҚШ Венесуэлага қарши тўлиқ иқтисодий санкцияларни 2019 йил август ойида жорий қилган эди.