Қашқадарёдаги туғуруқхонада чироқ ўчиб, чақалоқлар совуқда қолиб кетди

Туғуруқхонада чироқ бўлмагани учун унинг иситиш тизими ишламаган.

Фото: Видеодан кадр

Ижтимоий тармоқларда Қашқадарё вилояти Кўкдала тумани Чияли қишлоғида жойлашган туғуруқхонада чироқ ўчиб, чақалоқлар совуқда қолиб кетгани айтилган видеотасвир тарқалди.

Видеода аёллар туғуруқхонадаги хоналардан бирида ўраб қўйилган чақалоқларни кўрсатишган. Улар чироқ йўқлиги туфайли иситиш тизими ишламаётгани ва чақалоқлар совуқда қолиб кетганини айтишган.

Туман ҳокимлиги ахборот хизмати ўз муносабатида ҳолатни тасдиқлади:

«Кўкдала тумани Чиял ҳудудидаги туғуруқхонада чироқ йўқлиги айтилаётган видеомурожаат масаласида ҳозирда Қашқадарё вилояти ҲЭТК ходимлари муаммони бартараф этиш чораларини кўришмоқда. Туман ҳокимлиги ишчи гуруҳи вазиятни жойида ўрганиш учун юборилди. Тез орада ушбу ҳолат юзасидан қўшимча маълумот берилади», дейилади муносабатда.

#Электр энергияси #Қашқадарё вилояти