Херсонда россияликлар талаб кетган музейлар, инглизча ўрганаётган аскарлар. Уруш суратлари

Украинада урушнинг 302-куни ўтди. Асосий маълумотлар:

«Роскосмос»нинг собиқ раҳбари Дмитрий Рогозин Донецкдаги ресторан ўққа тутилиши оқибатида яраланди. Baza маълумотига кўра, бу собиқ мулозим ўз туғилган кунини нишонлаётган «Шиш-Беш» ресторанида рўй берган;
Украина қуролли кучлари бош штаби Россия армиясининг уруш бошидан буён берган йўқотишлари (ҳалок бўлганлар) тахминий сони 100 минг кишига етганини маълум қилди;
Associated Press журналистлари истило остидаги Мариуполда март ойидан буён 10 мингдан ортиқ янги қабрлар пайдо бўлганини аниқлади. Журналистлар сунъий йўлдош тасвирлари ва видеоматериалларни тадқиқ қилган ҳолда шундай хулосага келишган, уларнинг ҳисоб-китоблари археолог-криминалистлар томонидан ҳам тасдиқланган;
Америка ҳукумати «Вагнер» хусусий ҳарбий компанияси КХДРдан қуроллар партиясини қабул қилиб олганини хабар қилди.

Куннинг асосий воқеаси. Донецкдаги меҳмонхонага зарба, унинг натижасида Дмитрий Рогозин жароҳат олган

21 декабр куни «Роскосмос» давлат корпорациясининг собиқ раҳбари Дмитрий Рогозин Донецкдаги меҳмонхона ўққа тутилиши оқибатида яраланди. Собиқ амалдорнинг ўзи «осколка умуртқа поғонасидан бир сантиметр наридан ўтгани» ҳақида айтди. Аммо Baza у бошининг юмшоқ тўқималари, думба қисми ва чап сон қисмидан жароҳат олгани ҳақида ёзди. Кейинроқ шифокорлар унинг танасидан осколка парчаларини олиб ташлашни уддалай олишмаётгани ҳақида хабарлар чиқди. Рогозиннинг ўзи меҳмонхона ўққа тутилишини тасодиф деб ҳисобламаслиги ва кимдир унинг қаерда экани ҳақидаги маълумотни украинларга жўнатгани ҳақида гапирди. У туғилган кунига «ДХР» «бош вазири» Виталий Хоценкони чақирган, унинг ташрифидан 10 дақиқа ўтиб снарядлар учиб келган. Рогозин «ДХР» ҳудудида «Шоҳ бўрилари» («Царские волки») ҳарбий маслаҳатчилари гуруҳини бошқаради, бу гуруҳ ушбу ҳудуддаги ҳарбий бўлинмаларга ҳарбий-техник ёрдам кўрсатиш билан шуғулланади.