Жаҳон шахмат тожи учун баҳс апрелда ўтказилади 

Халқаро шахмат федерацияси (FIDE) хабарига кўра, 2023 йил 7-30 апрел кунлари жаҳон чемпиони унвони учун ўйин ўтказилади. 

Унда россиялик Ян Непомняшчий ва хитойлик Дин Лижэн баҳслашади. 

Ўйин ўтказиладиган жой ҳозирча аниқланмаган. 

Ўтган йилнинг июл ойида Непомняшчий номзодлар турнирида ғолиб чиқди ва жаҳон тожи учун баҳсда курашиш ҳуқуқини қўлга киритган эди. Унинг рақиби амалдаги чемпион норвегиялик Магнус Карлсен бўлиши керак эди, аммо у навбатдаги чемпионлик ҳимоясида қатнашмасликка қарор қилди. Натижада, унинг ўрнини номзодлар турнирида иккинчи бўлган Лижэн эгаллади. 

Карлсен 16-жаҳон чемпиони ҳисобланади. У тожни 2013 йилда қўлда киритган. Шундан кейин у Виши Ананд (Ҳиндистон), Сергей Карякин (Россия), Фабиано Каруана (АҚШ) ва Ян Непомняшчийга (Россия) қарши баҳсларда чемпионликни ҳимоя қилишга муваффақ бўлган.