Вазирлар Маҳкамасининг “Ўзбекистон президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил девонининг бюджетдан ташқари жамғармасини ташкил этиш тўғрисида”ги қарори қабул қилинди.
Ҳужжат билан Бизнес-омбудсман девонининг бюджетдан ташқари жамғармаси ташкил этилмоқда ва тегишли низом тасдиқланмоқда.
Жамғарма маблағлари: Бизнес-омбудсман девонининг моддий-техник базасини мустаҳкамлаш; ходимларни моддий рағбатлантириш, ўқув курсларида ўқитиш учун сарфланади.
Қуйидагилар Жамғарма маблағларини шакллантириш манбалари ҳисобланади:
Бизнес-омбудсман томонидан қўлланилган жарималар суммаси ҳамда расмийлаштирилган маъмурий ҳуқуқбузарлик тўғрисидаги баённомалар асосида судлар томонидан қўлланилган жарима суммасининг 100 фоиз миқдори;
техник кўмаклашиш маблағлари, халқаро ташкилотлар, хорижий ҳукумат ва ноҳукумат ташкилотларнинг грантлари;
жисмоний ва юридик шахсларнинг ҳомийлик хайриялари;
вақтинча бўш маблағларни тижорат банкларидаги депозитларга жойлаштиришдан олинадиган даромадлар.
Жамғармага раҳбарлик қилиш ва маблағларни сарфлаш масалалари жамғарма кенгаши томонидан амалга оширилади, Бизнес-омбудсман кенгаш раиси ҳисобланади.